Fenomeni i gjuetisë së paligjshme të thesareve në Shqipëri – ‘France 24’ vërejtje autoriteteve: Veproni, jo një sy qorr

Media prestigjioze franceze, France 24 është ndaluar për të analizuar fenomenin e gjuetisë së paligjshme të thesareve në Shqipëri. Në artikull evidentohet se Shqipëria mbart një pasuri të madhe të pazbuluar nëntokë,çka ka sjellë gërmime pa kriter dhe tregti të zezë të sendeve që zbulohen.

Në raportim, kjo media ngre shqetësimin se qeveria shqiptare duhet të përpiqet më shumë për të mbrojtur trashëgiminë historike dhe evidenton se sky fenomen ka zemëruar arkeologët të cilët duan të hedhin dritë mbi historinë e lashtë. Media franceze evidenton se gjuetarët e paligjshëm të thesareve po operojnë pothuajse pa u ndëshkuar në vend.

Në raportim sillet si shembull ajo që ka ndodhur në Korçë, në vendin që njihet si “Hija e Korbit”, një zonë e njohur për zbulimin e më shumë se 600 monedha argjendi antike.

Ekspertët i thanë Agjencisë franceze se  gërmime të paligjshme janë zbuluar pothuajse në çdo vend të rëndësishëm arkeologjik në rajon, i cili është shtëpia e nekropoleve historike, kalatë dhe vende të tjera që datojnë nga epoka e bronzit deri në mesjetën e hershme.

Gazetarët francezë kanë intervistuar shefen e Departamentit të Prehistorisë në Institutin e Arkeologjisë së Tiranës e cila është shoporehur se problemi qëndron te fakti se ‘Hija e Korbit”, ende nuk është eksploruar plotësisht nga arkeologët. Sipas saj, grabitësit dëmtojnë vendin dhe plaçkitin trashëgiminë duke shkatërruar kështu të dhënat shkencore dhe hequr objektet nga konteksti i tyre mjedisor,

Për agjencinë franceze Ministria e Kulturës e Shqipërisë tha se po bëhen përpjekje për të luftuar trafikimin e paligjshëm të pasurive kulturore duke përfshirë një plan kombëtar veprimi të shpalosur në 2018 së bashku me nismat për të përmirësuar koordinimin me organizatat ndërkombëtare.

France 24 thekson se nuk ka asnjë vlerësim zyrtar për vlerën e tregut të objekteve të marra nga Shqipëria. Por studiuesit janë të sigurt se disa nga artefaktet kanë rënë në duart e trafikantëve ndërkombëtarë dhe më pas janë shitur në ankande në muze dhe koleksione private jashtë vendit.

Marinela Lina / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.