Forumi Ekonomik i Shkupit, Ibrahimaj: “Open Ballkan” synon lehtësimin e tregtisë rajonale dhe zhvillimin ekonomik!

Ministrja e Financave dhe Ekonomisë, Delina Ibrahimaj, mori pjesë në Forumin Ekonomik të Shkupit ku foli për rëndësinë e bashkëpunimit rajonal në kuadër të iniciativës Open Ballkan, për të përmirësuar eficencën dhe liberalizimin e tregut të përbashkët, lëvizjen e kapitalit, të mirave dhe shërbimeve, si dhe lëvizjen e njerëzve.

Ministrja theksoi faktin se në kuadër të “Open Ballkan” po diskutohet edhe mbi politikat fiskale që do të zbatohen në të ardhmen dhe së shpejti do të nënshkruhet një Memoradum, në takimin që pritet të zhvillohet javën e ardhshme në Ohër si dhe u ndal gjithashtu edhe në efektivitetin e politikave fiskale të ndjekura nga qeveria shqiptare për përballimin e efekteve të pandemisë Covid 19.

Sipas njoftimit Ibrahimaj tha, se Shqipëria është aktualisht vendi i rajonit me normën më të ulët të inflacionit dhe shprehu besimin, se kriza që aktualisht po kalojmë është e përkohshme dhe çmimet do të nisin të ulen në gjysmën e dytë të vitit 2022.

“Qeveria shqiptare ka ndërmarrë hapat e duhur për përballimin e krizës duke miratuar stimujt e nevojshëm fiskalë, por edhe duke synuar zvogëlimin e borxhit dhe duke investuar në sektorët që do të sigurojnë rritje ekonomike”, u shpreh ministrja.

Sipas ministres një tjetër sfidë për vendin tonë lidhet me sigurimin e energjisë dhe kostot e larta të saj ku edhe në këtë drejtim, qeveria ndërhyri duke mbuluar kostot e rritura të energjisë, në mënyrë që të mos rritej kostoja e prodhimit dhe të mos prekej niveli i konsumit.

 E . S / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.