Gjermania refuzon të mbështesë thirrjet për ndalimin e vizave turistike për Rusinë!

Kancelari gjerman Olaf Scholz po refuzon të mbështesë thirrjet në rritje për një ndalim në mbarë BE-në për dhënien e vizave turistike për rusët. Duke folur në Oslo pas një takimi me udhëheqësit nordikë, Scholz tha: “Kjo nuk është lufta e popullit rus. Është lufta e Putin dhe ne duhet të jemi shumë të qartë në këtë temë”.

Gjatë muajit të fundit, Finlanda dhe Estonia kanë qenë ndër zërat kryesorë që bëjnë thirrje për një qasje në mbarë BE-në për të trajtuar çështjen e rusëve që shfrytëzojnë një “zbrazëtirë” të sanksioneve që u lejon atyre të udhëtojnë me rrugë tokësore në BE, kur sanksionet përndryshe do t’i pengonin ata nga fluturimi apo marrja e trenit.

Ekziston shqetësimi se kjo i lejon rusët të përdorin aeroportet ndërkombëtare si Helsinki për të udhëtuar lirshëm, për të shkuar me pushime dhe për të shmangur pasojat që synonin të kishin sanksionet. Kryeministrja finlandeze Sanna Marin, e cila mbështet ndalimin e vizave turistike, tha në Oslo se ishte një çështje që BE-ja duhet të diskutojë.

Dhe kryeministrja e Estonisë Kaja Kallas shkroi kohët e fundit në Twitter se “të vizitosh Europën është një privilegj, jo një e drejtë njerëzore. Udhëtimet ajrore nga Rusia janë mbyllur. Kjo do të thotë që ndërsa vendet e Shengenit lëshojnë viza, fqinjët me Rusinë mbajnë barrën (Finlanda, Estonia, Letonia – pika e vetme e hyrjes). Është koha për t’i dhënë fund turizmit nga Rusia tani.”

Komentet e saj shkaktuan një përgjigje të shpejtë dhe të zemëruar nga Kremlini, me Dmitry Medvedev – ish-kryeministër dhe president rus – e krahasoi Kallas me një naziste për komentet e saj.

Ndërsa Finlanda, Estonia dhe vende të tjera të BE-së në kufi me Rusinë ende shpresojnë se BE-ja do të marrë një vendim kolektiv për të ardhmen e vizave Shengen, disa vende po ndërmarrin veprimet e tyre. Finlanda ka zgjedhur një masë burokratike për të reduktuar numrin e vizave turistike të lëshuara në misionet e saj diplomatike në Rusi, duke ofruar më pak kohë takimesh për aplikime.

Estonia ka shkuar më tej dhe ka vendosur të ndalojë ofrimin e shërbimeve të vizave për rusët dhe do të refuzojë të lejojë çdo rus me viza turistike Shengen të lëshuara nga Estonia në kufijtë e saj, me Ministrin e Jashtëm të Estonisë Urmas Reinsalu që u kërkon vendeve të tjera të ndërmarrin veprime të ngjashme.

Ministrat e Jashtëm të BE-së pritet të diskutojnë këtë temë në takimin e tyre vjetor “Gymnich” në Republikën Çeke në fund të gushtit, megjithëse komentet e Scholz bëjnë të duket se, në fazën, një ndalim nuk do të kishte gjasa pa mbështetjen gjermane. Kritikët do të thonë se çdo ndarje e BE-së luan lojën e Rusisë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.