Greqia bëhet porta energjetike e Europës – Nënshkruhet marrëveshja për ndërtimin e terminalit të gazit!

Marrëveshja e nënshkruar të martën për të nisur ndërtimin e Njësisë së Magazinimit dhe Rigazifikimit Lundrues të Aleksandoupolit (FSRU) sinjalizon një ndryshim në hartën e energjisë në Europën Juglindore, me Greqinë që del si një furnizues kryesor i gazit për rajonin.

Terminali i ri, i planifikuar të nisë në dhjetor 2023, pritet të forcojë sigurinë energjetike të Greqisë dhe të rrisë rolin e saj strategjik rajonal, duke ofruar gjithashtu një rrugë alternative të furnizimit me gaz natyror që nuk kalon nga Turqia dhe do të reduktojë varësinë nga gazi rus.

Duke folur në përurimin e projektit historik në qytetin port në Greqinë veriore, kryeministri Kyriakos Mitsotakis tha se do të jetë një “portë e re energjie” që do të ndihmojë Europën dhe Ballkanin të bëhen më pak të varur nga furnizimet ruse.

Marrëveshja u nënshkrua nga Mitsotakis dhe kryeministri bullgar Kiril Petkov, në prani të krerëve të tjerë ballkanikë, presidentit të Këshillit Europian, Charles Michel dhe ambasadorit të SHBA në Greqi, Geoffrey R. Pyatt. Projekti, tha Mitsotakis, është një “fener që dërgon një mesazh të dyfishtë”.

“Me përfundimin e tij ne së shpejti do të jemi në gjendje të shpëtojmë nga gazi që vjen nga burimet ruse dhe vendet tona po marrin një rol të përbashkët në hartën e re të energjisë,” tha ai, duke iu drejtuar një auditori që përfshinte, mes personaliteteve të tjera, presidentin serb Aleksandar. Vuçiq dhe kryeministri i Maqedonisë së Veriut Dimitar Kovaçevski.

Mitsotakis tha se rezervuari i ri lundrues në Revithoussa, një ishull në perëndim të Athinës, do të rrisë gazifikimin e LNG me 155,000 metra kub dhe terminali i Aleksandoupolit do të shtojë 155,000 c.m., ndërsa instalimi i një terminali lundrues LNG pranë Agioi Theodoroi, Korinth, është i pashmangshëm.

“Kapaciteti i përgjithshëm i rigazifikimit do të jetë 8,500,000 c.m. Stacionet greke të LNG-së do të jenë në gjendje të mbulojnë jo vetëm tregun grek, por edhe të zëvendësojnë një pjesë shumë të rëndësishme të furnizimit me gaz rus në Ballkan,” tha Mitsotakis, duke deklaruar “ angazhim politik absolut” dhe se puna në FSRU të Aleksandoupolit do të përfundojë brenda 20 muajve të ardhshëm, duke hapur “një portë të re energjetike për Ballkanin dhe Europën Juglindore”.

“Shantazhi i fundit i Moskës për gazin natyror e bën bashkëpunimin jo vetëm të domosdoshëm, por do të thoja, urgjent. Greqia është një pioniere dhe tashmë është kujdesur për mjaftueshmërinë e saj kombëtare të energjisë dhe natyrisht është e gatshme të ndihmojë vendet fqinje si Bullgaria”, theksoi ai. Ekathimerini

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.