Hoqi taksën e fluturimit 10 euro, Qeveria: Kush përfiton – Vendimi: Ndihmë shtetërore për 19 kompani, 4 milionë pasagjere çmime më të lira

Përmes një vendimi të miratuar më 6 prill, Qeveria e ka kategorizuar ndihmë shtetërore me karakter social për pasagjerët vendimin për heqjen e taksës së fluturimit prej 10 eurosh. Qëllimi i ndihmës, sipas Këshillit të Ministrave, është rritja e numrit të pasagjerëve që udhëtojnë nga dhe drejt Shqipërisë si dhe ulja e çmimit të biletave, ndërkohë që plani ofron një avantazh ekonomik për ndërmarrjet ekonomike në këtë treg. Në Vendim përcaktohet se Dhënësi i ndihmës është Ministria e Financave dhe Ekonomisë,  Autoriteti përgjegjës për monitorimin e zbatimit të masës është Ministria e Infrastrukturës dhe Energjisë (MIE).

Ligji i ndihmës shtetërore zbatohet vetëm në rastet kur ajo plotëson katër kritere: konkretisht: a) burime shtetërore; b) avantazhi ekonomik; c) selektiviteti; dhe d) efekti në konkurrencë dhe treg. Në vendim Këshilli i Ministrave konstaton se rasti në fjalë i përmbush që të katërta.

Në Vendim Qeveria citon Ministrinë e Infrastrukturës, sipas së cilës në vitin 2021, në Shqipëri ka 19 operatorë ajrorë, kundrejt vitit 2019, në të cilin kanë ushtruar aktivitetin 17 operatorë ajrorë. Sipas MIE-s, heqja e tarifës aktuale, do të ketë një impakt domethënës në uljen e çmimit të biletave, duke ndikuar pozitivisht tek operatorët për të rritur numrit e destinacioneve të fluturimeve nga aeroporti, në përputhje me objektivat e Strategjisë së Aviacionit Civil. Gjatë vitit 2019 në aeroportin e

TIA-s janë regjistruar rreth 3,338,147 pasagjerë, ndërkohë që në vitin 2021 ky numër arriti në 2,923,533 pasagjerë. Vlerësohet se ulja e çmimit të biletave, si pasojë e heqjes së tarifës aktuale, do të rrisë edhe më shumë aksesin në aviacion dhe parashikimi i pasagjerëve, vetëm gjatë 2022, pritet të arrijë në 4 milionë pasagjerë. “Heqja e kësaj tarife do të ketë një impakt të drejtpërdrejtë në rritjen e trafikut ajror, numrit të linjave ajrore, destinacioneve të reja dhe numrit të pasagjerëve edhe në infrastrukturat e reja aeroportuale, siç është Aeroporti Ndërkombëtar i Kukësit dhe Aeroporti Ndërkombëtar i Vlorës. Në këto kushte, Komisioni vlerëson se plani i njoftuar është ndihmë shtetërore”, thekson Këshilli i Ministrave në Vendimin e 6 prillit.

Tarifa e shërbimit për kalimin me avion të kufirit të Republikës së Shqipërisë është vendosur prej rreth 20 vitesh, dhe siguron çdo vit dhjetëra miliona dollarë të ardhura në buxhetin e shtetit. Sipas vetë projeksioneve të Qeverisë, me 4 milionë fluturime në vit, në arkën e shtetit do të mungojnë rreth 40 milionë dollarë.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.