Huaja, më pak se 30% e të ardhurave mujore për familjet – Sipas BSH, pritet ulje e kërkesës për kredi në gjysmën e parë 2024

Kërkesa e familjeve për kredi dhe aftësia e tyre paguese nuk kanë ndryshuar në gjysmën e dytë të vitit të shkuar. Në vrojtimin që Banka e Shqipërisë ka realizuar mbi gjendjen financiare dhe ngarkesën në borxh të familjeve, rezultatet tregojnë se pavarësisht luhatjeve, niveli i huamarrjes së familjeve dhe mundësia për t’i paguar paraqiten të qëndrueshme dhe pa ndryshime të rëndësishme nga periudha e mëparshme.

Rreth 83% e familjeve kanë deklaruar se pagesa e huasë zë më pak se 30% të të ardhurave mujore dhe ky tregues është rritur me 9% në terma gjashtëmujorë dhe me 10% krahasuar me vitin 2022. Nga ana tjetër, pesha e familjeve ku pagesa e huasë tejkalon 30% të të ardhurave ka rënë me 14% dhe 12% krahasuar me periudhat e mësipërme, duke sinjalizuar zbutje të ngarkesës financiare të borxhit, pavarësisht rritjes së normave në vend.

Rreth 55% e familjeve huamarrëse kanë deklaruar se aftësia e tyre paguese nuk ka ndryshuar gjatë periudhës, ndërsa pjesa tjetër raportojnë përkeqësim të aftësisë së tyre paguese, por ndjeshëm më të zbutur krahasuar me gjashtë muajt e parë të 2023-it.

Nëse analizojmë nivelin e huamarrjes nga viti 2018 deri në vitin 2023, vërehet se familjet shqiptare kanë marrë më shumë kredi në gjysmën e parë të vitit 2022, ndërsa gjysma e parë e vitit 2020 shënon nivelin më të ulët të huamarrjes, përkatësisht me vetëm 25% të familjeve që kanë përfituar kredi. Megjithatë, në një hark kohor prej 6 vitesh niveli i aftësisë paguese është shoqëruar me luhatje të mëdha.

Në gjysmën e parë të vitit 2024 parashikohet që qytetarët shqiptarë të marrin më pak kredi. Rreth 57% e familjeve të pyetura janë treguar më optimiste se vitin e shkuar duke deklaruar se nuk presin të marrin hua të re në 6 muajt e parë të 2024.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.