‘Hungaria do të ketë mjaftueshëm’: Orban konfirmon marrëveshjen e ardhshme të gazit me Rusinë!

Kryeministri i Hungarisë tha të premten se do të nënshkruajë një marrëveshje të re me Rusinë në muajt e ardhshëm, e cila do të furnizojë vendin me gati një miliardë metra kub gaz. Duke folur në radion lokale, Viktor Orban tha se priste një marrëveshje me Moskën këtë verë për t’i siguruar Hungarisë 700 milionë metra kub gaz shtesë.

“Ne jemi duke negociuar me rusët… kjo marrëveshje mund të nënshkruhet gjatë verës dhe atëherë do të jemi të sigurt,” tha ai. “Hungaria do të ketë mjaftueshëm gaz.” Një metër kub gaz furnizon afërsisht të njëjtën sasi energjie si një litër naftë.

Kjo marrëveshje e re vjen në krye të një marrëveshjeje 15-vjeçare që Budapesti nënshkroi me gjigantin energjetik shtetëror të Rusisë Gazprom vitin e kaluar për të furnizuar rreth 4.5 miliardë metra kub gaz në vit.

Njoftimi vjen pasi Ministri i Jashtëm hungarez Péter Szijjártó vizitoi Moskën javën e kaluar për të diskutuar potencialin për një marrëveshje me homologun e tij rus Sergej Lavrov. Kryediplomati rus tha në atë kohë se “kërkesa e Budapestit për më shumë gaz do të shqyrtohet menjëherë”.

Hungaria është aktualisht pas vendeve të tjera anëtare të BE-së në sigurimin e furnizimeve me gaz përpara dimrit. Rezervat e vendit janë vetëm 50% të plota, krahasuar me një mesatare në mbarë bllokun prej 68%, sipas Politico.

Hungaria, si shumë vende të tjera europiane, është shumë e varur nga energjia ruse, me rreth 80 për qind të gazit të saj që vjen nga Rusia. Budapesti ka kundërshtuar me vendosmëri çdo sanksion të mundshëm të BE-së për gazin rus, megjithëse nuk ka votuar kundër paketave ndëshkuese të Brukselit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.