Inflacioni në Holandë kap shifrën më të lartë në gati 47 vjet!

Inflacioni në Holandë u rrit në mbi 10 % për herë të parë që nga viti 1975 muajin e kaluar, tha agjencia e statistikave të vendit CBS. Çmimet e energjisë dhe banesave shkaktuan kryesisht rritjen e inflacionit, shtoi CBS në një deklaratë.

Çmimet ishin 10.3% më të larta në korrik 2022 krahasuar me një vit më parë ndërsa inflacioni në muajin qershor ishte 8.6%. Çmimet e energjisë në Holandë ishin 108% më të shtrenjta në korrik se në të njëjtin muaj në 2021, shtoi zyra e statistikave. Qiratë e banesave ishin 3% më të larta në korrik 2022 se vitin e kaluar.

Çmimet e ushqimeve janë rritur gjithashtu në Holandë ato ishin 12.3 për qind më të shtrenjta se në të njëjtin muaj të vitit të kaluar, tha agjencia. Ndërkohë, çmimi i një litri benzinë ​​”ra nga 2,35 euro në qershor në 2,21 euro në korrik. Çmimi i naftës ishte 2,07 euro në korrik kundrejt 2,14 euro në qershor,” tha Statistikat e Holandës.

Kjo vjen pasi inflacioni rritet në vendet europiane kryesisht për shkak të rritjes së çmimeve të energjisë. Inflacioni në eurozonë ishte deri në nivelin më të lartë historik prej 8.9% në korrik 2022, me çmimet e energjisë që u rritën më shumë se 39% nga viti në vit.

Estonia, Letonia dhe Lituania janë vendet europiane me inflacionin më të lartë për shkak të një varësie të madhe nga importet e huaja për energji. Sipas Eurostat, gjithsej 10 shtete që përdorin monedhën e vetme kishin përqindje inflacioni dyshifror: Belgjika, Estonia, Greqia, Spanja, Qiproja, Letonia, Lituania, Holanda, Sllovenia dhe Sllovakia.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.