Institucionet “problematike” të tenderëve – Ankesat te KPP/ Kryesojnë Agjencia e Blerjeve të Përqendruara, UKT e Shëndetësia
Agjencia e Blerjeve të Përqëndruara, Ujësjellës – Kanalizime Tiranë dhe Ministria e Shëndetësisisë dhe Mbrojtjes Sociale janë 3 institucionet që kryesojnë listën e ankesave të dorëzuara nga operatorët ekonomikë, pranë Komisionit të Prokurimit Publik për procedura tenderuese të realizuara prej tyre.
Sipas të dhënave zyrtare, ndaj këtyre institucioneve gjatë vitit 2022 u depozituan 118 ankesa, apo rreth 15 % e totalit. Ndërkaq, ndër 10 autoritetet kontraktore me ankesat më të shumta janë edhe Ministria e Arsimit dhe Sportit, Bashkia Durrës, QSUNT, Posta Shqiptare, Instituti i Sigurisë Ushqimore dhe Veterinare, Agjencia e Parqeve dhe Rekreacionit dhe Ministria e Mbrojtjes.
Ndaj këtyre 10 institucioneve janë depozituar 28% e ankesave, që subjektet kanë për hartimin e dokumeneteve të tenderit apo për kundërshtimin e vlerësimit të ofertave. Sa i takon fondit limit, procedurat që ankimohen më shpesh pranë KPP-së janë ato që bëjnë pjesë në intervalin 1 000 001 – 5 000 000, me 37.59% të totalit, ndërsa tenderët me fond limit mbi 100 mln lekë zënë rreth 9% të totalit. Gjatë vitit që shkoi pranë KPP-së u depozituan në total 794 ankesa, teksa gati gjysma e tyre u pranua nga Komisioni, duke iu dhënë të drejtë operatorëve ekonomikë.
Numrin më të madh të ankesave, e zënë ato në lidhje me procedurat unike të prokurimit për kontratat për mallra me 486 të tilla, për kontratat për shërbime me 235 ankesa, duke vijuar me ankesat për kontratat për punë publike me 73 ankesa.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.