Investim strategjik, parku energjetik me fuqi 826 MW – Miratohet faza e parë për central diellor dhe eolik. Rrëzohen 7 aplikime të tjerë

Komiteti i Investimeve Strategjike ka miratuar projektin për ndërtimin e një parku fotovoltaik dhe eolik në Tropojë, teksa 7 aplikime të tjerë janë refuzuar. Statusi i investitorit potencial strategjik i është dhënë kompanisë Eralb Invest 2 shpk, për projektin që parashikon një kapacitet total të instaluar prej 826 MW.

Vlera e investimit të projektit me potencial strategjik parashikohet të jetë 1.2 miliardë Euro, ndërsa synon të realizohet në një sipërfaqe prej 384.6 ha të shtrirë në fshatrat Viçidol, Berishë, Luzhë dhe Paç, në Bashkinë e Tropojës.

Projekti përbëhet nga një park i energjisë së erës me kapacitet 636 MW, ku do të instalohen 100 turbina ere si dhe nga një park fotovoltaik me kapacitet 190 MW, ku do të instalohen 418 500 panele diellore.

Subjekti ka ndarë projektin në faza, ku faza e parë do të fillojë me një fushatë matëse të burimeve të erës, faza e dytë do të përcaktojë gjurmën e saktë të projektit me vendndodhje të saktë për secilën turbinë dhe faza e tretë do të konsistojë në aplikimin për përfitimin e statusit përfundimtar “Investim/investitor strategjik”.

Ndërkaq, 7 aplikime të tjerë për parqe fotovoltaike janë refuzuar me argumente të ndryshme, duke nisur që nga pozicionimi në toka bujqësore me bonitet të lartë apo Brenda zonave që gëzojnë status mbrojtjeje e deri te mospërputhjet me Planet e Përgjithshme Vendore të bashkive të parashikuara për t’u pozicionuar.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.