Fondet e investimeve, 30 Mln euro më shumë se 2022 – Rikthim gradual në normalitet. Rritet vlera e aseteve, si dhe numri i anëtarëve

Fondet e investimeve në vend duket se kanë lënë pas momentin e vështirë që kaluan në vitin 2022, duke u rritur brenda nëntëmujorit të këtij viti me më shumë se 30 milionë euro. Ndërkohë që në rritje ka ardhur edhe numri i anëtarëve të tyre.

Sipas të dhënave zyrtare të Autoritetit të Mbikqyrjes Financiare, numri i anëtarëve që kanë investuar në Fondet e Investimit më 30.09.2023 është 31,281 me një rritje prej 8.07% krahasuar me 31.12.2022. Vetëm në tremujorin e tretë të këtij viti, numri i anëtarëve është shtuar me mbi 1,200, duke parë se për në mes të këtij viti, numri i tyre qe 30,77. Thuajse të njëjtën ecuri ka shënuar edhe volumi i fondeve të investuara përmes tyre.

Sipas të dhënave zyrtare të Autoritetit të Mbikqyrjes Financiare për tregun e fondeve të investimeve në 30.09.2023, vlera neto e aseteve të Fondeve, arriti rreth 44.76 miliardë lekë me një rritje prej 3.29 miliardë lekë ose 7.94%, krahasuar me fundin e vitit të shkuar.

Rritja graduale por e qëndrueshme gjatë vitit 2023, vjen pas zhvillimeve negative që pësoi ky treg gjatë vitit të shkuar për shkak të rritjes së fortë të inflacionit. Rriitja e tij solli për pasojë disa ndërhyrje të njëpasnjëshme të Bankës së Shqipërisë në normën bazë të interesit, rritja e së cilës zhvleftësoi, duke çuar në territor negativ, kthimet nga fondet e investimeve. Kjo u shoqërua me tërheqje të shpejtë të fondeve nga shumë investitorë.

Numri i anëtarëve ra nga 40,054 në 28,953 brenda vitit, ndërkohë që asetet nga 73 miliardë lekë, ranë me 47% në 38.6 miliardë lekë, ose thuajse duke u përgjysmuar. Megjithatë jemi ende larg shifrave të vitit të shkuar, kur numri i anëtarëve ishte mbi 40 mijë, ndërsa totali i aseteve të fondeve mbi 73 miliardë, ndërkohë që këtë vit numërohen 31 mijë anëtarë dhe 44 miliardë lekë asete.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.