Shqipëria, pjesë e Programit të Tregut të Përbashkët – Ratifikohet marrëveshja me BE. 1 mld euro për nxitjen e konkurrencës së SME-ve

Shqipëria do të jetë pjesë e Programit të Tregut të Përbashkët, me qëllim kryesor nxitjen e konkurrencës midis bizneseve të vogla dhe të mesme. Eshtë ratifikuar marrëveshja midis Shqipërisë dhe Bashkimit Evropian, e cila do t’i japë mundësi SME-ve të aplikojnë për fonde në këtë program.

Programi ka një buxhet total prej 4.2 miliardë eurosh, ndërkohë që Shqipëria do të përfshihet vetëm në shtyllën e dedikuar për mbështetjen e bizneseve të vogla dhe të mesme me fond 1 miliardë euro. Bizneset mund të përfitojnë nga një sërë mundësish financimi që shtrihen nga ndihmat për t’u zhvilluar dhe zgjeruar, për të aksesuar më shumë ose tregje të reja dhe deri te promovimi i aftësive sipërmarrëse sociale.

Specifikisht, synohet inkurajimi i ndërmarrjeve të vogla dhe të mesme që të bashkëpunojnë me biznese të tjera, institucionet kërkimore dhe palët e interesuara, mentorimi dhe ngritja e kapaciteteve, pjesëmarrja në projekte që fokusohen në inovacionin, digjitalizimin dhe praktikat e qëndrueshme të biznesit apo sigurimi i burimeve dhe iniciativave për përfshirjen në tregtinë ndërkufitare.

Shqipëria do të jetë pjesë e këtij programi si vend i asociuar dhe jo me të drejta të plota. Pavarësisht përfitimeve të shumta nga fondet që priten të shpërndahen, fillimisht duhet që vendi ynë të paguajë një kontribut financiar operacional dhe një tarifë pjesëmarrjeje.

Ky është një hap i rëndësishëm për Shqipërinë në rrugën drejt anëtarësimit të plotë në tregun e përbashkët evropian, si dhe në nxitjen e konkurrencës e qëndrueshmërisë së bizneseve, veçanërisht atyre të vogla dhe të mesme.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.