Investitorët, interes për energjinë e erës – Pas 15 vitesh nga licenca e fundit, depozitohet aplikimi për central 50 MW

Pas një interesi në rritje për ndërtimin e centraleve diellore, investitorët po shfaqin interes edhe për energjinë e prodhuar nga era. Pranë Ministrisë së Infrastrukturës dhe Energjisë është depozituar aplikimi për ndërtimin e një impianti eolik, me kapacitet 50 MW, me vendndodhje në Bashkinë Dropull, Qarku Gjirokastër e që nuk përfiton nga masat mbështetëse të qeverisë. Nëse procedurat mbyllen me sukses, ky do të jetë centrali i parë i madh eolik që licencohet pas 15 vitesh.

Kjo pasi, aktualisht janë vetëm 2 licenca aktive në veptimtarinë e prodhimit të energjisë nga era, që janë dhënë qysh në vitet 2007-2008 e që gjithsesi nuk kanë nisur aktivitetin e tyre.

Aktualisht, ky burim energjie mbetet i pashfrytëzuar në vendin tonë, duke qenë se asjë impiant nuk ka hyrë në prodhim. Vetë Ministria e Infrastrukturës dhe Energjisë ka hapur një procedurë ankandi nëpërmjet të cilit synon të përzgjedhë projekte më një kapacitet të përgjithshëm prej 100 MW të cilët do të përfitojnë masat mbështetëse për blerjen e energjisë.

Procesi konkurrues u hap në mesin e vitit 2021, teksa fituesit parashikohet të shpallen në vitin 2023. Paralelisht, një sërë miratimesh paraprake dhe përfundimtare për centrale të vegjël janë dhënë nga ky dikaster, por ende nuk janë përfunduar procedurat pranë Entit Rregullator të Energjisë, teksa një pjesë e tyre parashikohet të ndërtohen në zona, ku zhvillimi i tyre është i ndaluar nga pikëpamja mjedisore.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.