Janar-mars, Qeveria shton ndjeshëm bonot e obligacionet – 1.4 miliardë euro letra me vlerë për tremujorin e pare. 23 miliardë lekë më shumë se 2023

Qeveria ka dhënë që në janar sinjalin se do orientohet fort nga borxhi i brendshëm për të mbuluar nevojat për financim. Në kalendarin e emetimeve të bonove e obligacioneve për tremujorin e parë të vitit, të publikuar nga Ministria e Financave, vërehet se për tremujorin e parë të vitit, Qeveria ka planifikuar të emetojë 144.5 miliardë lekë, apo afërsisht 1.4 miliardë euro bono thesari e obligacione. Shuma është dukshëm më e lartë se e njëjta periudhë e vitit që sapo lamë pas. Totali i emetimeve për periudhën janar-mars 2023 ishte 121 miliardë lekë, apo 23 miliardë lekë më pak se tremujori i parë i këtij viti.

Janari do të jetë muaji me më pak emetime, afërisht 50 miliardë lekë, apo rreth 500 milionë euro. Emetimet e muajit të parë të vitit do të dominohen tërësisht nga emetimi i bonove të thesarit me afat maturimi 12-mujor. Janë parashikuar për këtë muaj tre emetime bonosh njëvjeçare, i pari prej të cilëve është caktuar të zhvillohet në datën tre janar. Shuma totale e shpallur nga Ministria e Financave është mjaft e lartë, 14 miliardë lekë, afërisht 140 milionë euro.

Po kjo shumë do të emetohet edhe në ankandin e dytë të janarit, i cili do zhvillohet më datë 16. Më datë 23 janar është parashikuar të zhvillohet edhe ankandi i tretë, ku është parashikuar të shpallet nga Ministria e Financave gjysma e shumës së ankandeve të mëparëshme, 7 miliardë lekë, apo afërisht 70 milionë euro.

Vlerat e emetuara do të rriten dukshëm gjatë muajit shkurt, në 60 miliardë lekë apo afërisht 600 milionë euro. Edhe për shkurtin do të jenë bonot me afat maturimi 12-mujor ato që do të dominojnë ankandet. Janë parashikuar për këtë muaj tre ankande bonosh 1-vjeçare, me emetime përkatësisht 13.5 miliardë, 12.5 miliardë dhe po ashtu 12.5 miliardë, për një total prej mbi 38 miliardë lekësh, apo afërisht 380 milionë dollarësh.

Në muajin mars janë parashikuar vetëm dy ankande bonosh me afat maturimi 12 mujor, ssecili me vlerën 8.5 miliardë lekë, apo afërisht 85 milionë euro. Pjesa tjetër e ankandeve dominohet nga obligacionet, ndërkohë që parashikohen dy emetime afatshkurtëra, i pari me bono me afat maturimi 3-mujor në janar dhe i dyti me bono 6-mujore në shkurt.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.