Jo administrim jopublik të trashëgimisë kulturore – Nisma në Kuvend/ Përjashtime, vetëm për rastet kur organizatat janë pronësi e institucioneve

Në Kuvend është depozituar një amendament që synon të ndalojë administrimin e pasurive të trashëgimisë kulturore nga organe jopublike. Nisma që mban firmën e deputetes Ina Zhupa, vjen në një kohë që në Kuvend po shqyrtohet ligji që kalon për herë të parë në administrim jopublik, qendrën më të njohur arkeologjike në Shqipëri, Butrintin.

Projektligji synon që pasuritë e trashëgimisë kulturore të administrohen drejtpërdrejtë dhe eskluzivisht vetëm nga shteti. Si rast përjashtimor, pasuritë e trashëgimisë kulturore mund të administrohen edhe nga fondacione, të organizuara sipas ligjit për organizatat jofitimprurëse, por vetëm në ato raste kur këto fondacione janë krijuar dhe janë në pronësi të institucioneve publike.

“Në këtë mënyre garantohet ruajtja e pasurive të trashëgimisë kulturore nga institucionet publike apo fondacionet në pronësi të tyre, duke garantuar që të ardhurat e siguruara nga pasuri të arketohen në Buxhetin e Shtetit, dhe të përdoren për mirëmbajtjen e këtyre pasurive, por edhe ne te mirë të komunitetit që jeton pranë këtyre siteve, nëpërmjet investimeve në infrastrukturë, shkolla, spitale, parqe, gjelbërim etj” shkruhet në projektligj.

Shfuqizimi i dispozitave ligjore që mundësojnë administrimin e pasurive të trashëgimisë kulturore nga persona private apo fondacione të krijuara ndërmjet institucioneve publike dhe personave privatë, sipas propozueses, iu heq këtyre të fundit mundësinë që nëpërmjet skemave korruptive, klienteliste apo abuzive t’i përdorin pasuritë kombëtare për t’u pasuruar vetë apo miqtë e tyre qeveritarë.

Sipas argumentimit në relacion, institucionet e trashëgimisë kulturore, por edhe institutet shkencore, kanë të gjitha kapacitetet e nevojshme njerëzore dhe logjistike për të siguruar një mirëadministrim të pasurive të trashëgimisë kulturore, në mënyrë që këto të fundit jo vetem të shërbejnë si pika reference për turistët që zgjedhin të vizitojnë vendin tonë, por edhe si një burim i mirë të ardhurash për Buxhetin e Shtetit, por edhe për institucionet e qeverisjes vendore.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.