Kartmonedhat euro ndotin shumë pak – BQE publikon një studim për ndikimin mjedisor të tyre

Nga prodhimi tek riciklimi. Gjatë jetëgjatësisë së tyre, kartëmonedhat euro ndotin pak. Kjo do të thotë, se kanë një rezultat shumë të ulët të gjurmës mjedisore, ekuivalent me ndikimin e një qytetari të zonës së euros duke drejtuar një automjet të kategorisë standarde për 8 kilometra, ose 0.01% të ndikimit total mjedisor të aktivitetit të konsumit vjetor të energjisë nga një qytetar europian.

Sipas studimit të Bankës Qendrore Europiane, ndikimi në aspektin e ndotjes së një kartëmonedhe do të ishte ‘shumë i vogël’, duke marrë parasysh se gjurma mesatare mjedisore e pagesave me cash ishte 101 mikropikë – Pt për qytetar të zonës së euros në 2019-ën.

U zbulua se faktorët kryesorë që kontribuojnë në gjurmën mjedisore të kartëmonedhave euro janë konsumi i energjisë i makinerive automatike të arkëtimit, ATM-të dhe transporti, ndjekur nga faktorë të tjerë si prodhimi i letrës dhe verifikimi i kartëmonedhave në dyqane. BQE thekson se jetëgjatësia e kartëmonedhave dhe fakti që ato përdoren për shumë pagesa do të thotë se ndikimi i prodhimit të kartëmonedhave “është më i ulët se ai i transportit dhe shpërndarjes”.

Studimi thekson se eurosistemi është i përkushtuar që t’i bëjë kartëmonedhat euro sa më miqësore me mjedisin, duke siguruar disponueshmërinë dhe pranimin e gjerë të parave të gatshme. Ndërhyrja e BQE-së për çështjen e ndotjes së prodhuar nga kartëmonedhat do të jetë edhe më e mprehtë në të ardhmen dhe veçanërisht në muajt në vijim. Megjithatë, kërkime dhe studime të gjera janë duke u zhvilluar për t’i bërë kartëmonedhat e ardhshme euro edhe më miqësore me mjedisin në të gjitha fazat e ciklit të tyre të jetës.

Për shembull, BQE po eksploron metoda alternative të asgjësimit të mbetjeve të kartëmonedhave, të tilla si riciklimi dhe ripërdorimi i materialeve të mbeturinave, dhe përmirësime të mundshme të materialeve dhe përbërësve të përdorur në procesin e printimit. Këto veprime janë gjithashtu pjesë e angazhimit më të gjerë të Bankës Qendrore për të trajtuar ndryshimet klimatike brenda mandatit të saj dhe për të reduktuar gjurmën e saj mjedisore në përputhje me objektivat e Marrëveshjes së Parisit dhe objektivat e neutralitetit klimatik të Bashkimit Europian.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.