KE ‘shuplakë’ amnistisë – “Drafti aktual ngre shqetësime serioze”

Komisioni Europian shprehet i shqetësuar për draftin e qeverisë për amnistinë fiskale. Në një deklaratë, komisioni evidenton se kjo nismë do të dobësonte kontrollet për pastrimnin e parave dhe do të vinte në pikëpyetje reputacionin e vendit

Nisma e qeverisë për amnisti fiskale merr shuplakën e parë ndërkombëtare. Komisioni Europian shprehet i shqetësuar për nismën e re të qeverisë që është në proces konsultimi publik. Sipas komisionit, amnistia do të dobësonte kontrollet e Shqipërisë për parandalimin e pastrimit të parave si dhe nuk do të ndikojë pozitivisht në administrimin e taksave në Shqipëri.

“Për më tepër, për shkak se rezidentët jotatimorë, përfshirë shqiptarët që jetojnë në BE ose në Ballkanin Perëndimor, përfshihen në objektin e tij dhe u kërkohet të importojnë para për të përfituar nga amnistia, drafti aktual i ligjit ngre shqetësime serioze për anëtarët e BE-së, shtetet dhe partnerët e tjerë dhe një rrezik thelbësor reputacioni për vendin” shkruhet në deklaratën e mbajtur gjatë takimit të 13-të të Nënkomitetit për Tregtinë, Industrinë, Doganat dhe Tatimet ndërmjet BE-së dhe Shqipërisë, në Bruksel.

Në këtë takim,Shqipëria përfaqësohej nga zëvëndësministrja e Financave Vasilika Vjero. Pas disa faljesh fiskale, qeveria shqiptare ka ndërmarrë iniciativën e hartimit të një amnistie fiskale, duke përfshirë dhe garancinë penale.

Referuar draftit, individët drenda dhe jashtë vendit mund të deklarojnë deri në 2 milionë euro kundrejt disa kushteve. Amnistia në thelb përfshin dy natura deklarimesh, e para për kompanitë dhe qytetarët rezidentë në Shqipëri që të mund të deklarojnë bilancet reale dhe e dyta, për kompanitë dhe qytetarët rezidentë apo jorezidentë që mund të deklarojnë pasuritë e luajtshme dhe të paluajtshme, përfshirë paratë e sendet e çmuara, në mënyrë që t’i legalizojnë ato.

Në funksion të këtij ligji është caktuar edhe ai që njihet si Tatim i Posaçëm, që në thelb tenton të orientojë fondet e padeklaruara në ekonominë formale të vendit. Tatimi i posaçëm është i ndarë në 2 fasha të ndryshme, që përfshijnë paratë nga njëra anë dhe pasuritë e paluajtshme nga ana tjetër.

Në mënyrën sesi është hartuar drafti, kuptohet se paratë e deklaruara, tentohet t’i kalojnë në investim në ekonominë formale, sidomos drejt titujve shtetërore. Në vitet e mëparshme janë realizuar disa falje fiskale, po që nuk kanë sjellë rezultatin e pritshëm për shkak të mungesës së garancive për mosndjekjen penale të deklaruesve.

Pritshmëritë janë që amnistia fiskale t’i japë një puls të ri ekonomisë, pasi në sistemin formal potenciali është që të përfshihen më shumë se 2 miliardë euro.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.