Tregjet europiane i rikthehen fitimeve – Indeksi i moralit të investitorëve sugjeron recesion të paevitueshëm

Bursat europiane i janë rikthyer fitimeve në sesionin e sotëm, pasi tregu po tenton rimëkëmbjet që filloi ditën e djeshme në Wall Street. Indeksi pan-Europian Stoxx 600 e ka nisur ditën në rritje me 1.3%, ndërsa sektori i shitjeve me pakicë realizon fitimet më të mëdha në rritje me 2.7% në sesionin e kaluar, ndërkohë, tregjet europiane ranë me mbi 2%, për shkak të frikës për recesion në Eurozonë.

Indeksi Sentix i moralit të investitorëve ra në të 19 vendet e Eurozonës, duke prekur nivelin më të ulët që nga maji i vitit 2020, që sugjeron një recesion të paevitueshëm.

Gjithashtu, edhe lufta në Ukrainë, që nuk po tregon shenja të përfundimit ka ushtruar presion mbi tregjet.

Investitorët po presin edhe procesverbalin e takimit të fundit të Rezervës Federale, që publikohet më vonë gjatë ditës së sotme, dhe të dhënat mbi punësimin në SHBA për qershorin, që publikohen të premten.

Analistët parashikojnë se, ekonomia më e madhe në botë do të ketë krijuar edhe 250 mijë vende të reja pune, kundrejt 390 mijë në maj.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.