KESH, impiant diellor 50 MWp në Belsh – Drejt finalizimit kredia 30 mln euro nga BERZH, kosto totale është 40 mln euro 

Korporata Elektroenergjetike Shqiptare synon diversifikimin e burimeve të prodhimit të energjisë, përmes ndërtimit të një centrali diellor 50 MWp në zonën e Belshit, teksa së fundmi duket se ka avancuar në sigurimin e financimit të nevojshëm për finalizimin e projektit. Vepra, ka një kosto totale prej 40 mln euro, ndërkohë që 30 mln euro parashikohet të financohen përmes një kredie nga Banka Evropiane për Rindërtim dhe Zhvillim.

Pak ditë më parë BERZH përditësoi statusin për këtë kredi, që do të jetë me garanci sovrane apo thënë ndryshe me garanci nga buxheti i shtetit, teksa aprovimi parashikohet të bëhet në korrik të këtij viti.

Ndërkaq, projekti pritet të financohet gjithashtu përmes një granti prej 8 milionë euro nga Instrumenti i Investimeve për Ballkanin Perëndimor (“WBIF”) dhe pjesa tjetër prej 2 mln euro, përmes një injeksioni të kapitalit nga KESH.

Impianti fotovoltaik prej 50 MWp dhe nënstacioni i lidhur do të ndodhen në Bashkinë e Belshit në një hapërisë prej rreth 60 ha, ndërsa një linjë e re rreth 9 km, 110 kV do ta lidhë atë me rrjetin në nënstacionin ekzistues në Kajan, i cili do të zgjerohet si pjesë e projektit.

KESH zotëron dhe operon tre hidrocentralet publike të Kaskadës së Drinit, me një kapacitet të instaluar të kombinuar prej 1.350 MW, si dhe një impiant diellor impiantit prej 5 MWp të pozicionuar në digën e Qyrsaqit, në Vaun e Dejës.  Ndërkaq, gjenerimi i impiantit në BLESH pritet të përbëjë rreth 1% të prodhimit vjetor kombëtar të energjisë elektrike.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.