Kjo ‘shtëpi lëvizëse’ me energji diellore është projektuar nga studentë! (FOTOT)

• Studentët nga Universiteti Teknik i Eindhoven në Holandë kanë krijuar një ‘shtëpi lëvizëse’ me energji diellore, me formën e një pike të madhe loti.
• Panelet e gjera diellore në çati dhe në krahët anësore lejojnë automjetin të udhëtojë deri në 740 km në një ditë me diell.
• Ekipi i shpikësve shpreson se automjeti i tyre do të frymëzojë prodhuesit e makinave dhe politikanët për të përshpejtuar tranzicionin drejt energjisë së gjelbër.

Shtëpia lëvizëse me energji diellore, nisi udhëtimin në Madrid të premten si pjesë e projektit njëmujor nga Holanda në Spanjën jugore për të nxjerrë në pah mënyra më të qëndrueshme të transportit.

Studentët e inxhinierisë në Universitetin Teknik të Eindhoven në Holandë krijuan automjetin blu dhe të bardhë, të quajtur Stella Vita – latinisht për “yll” dhe “jetë” – për të frymëzuar prodhuesit e makinave dhe politikanët për të përshpejtuar tranzicionin drejt energjisë së gjelbër.

Panelet e gjera diellore në çati dhe në krahët anësore që shpalosen kur automjeti ndalon, lejojnë shtëpinë e vetëqëndrueshme me rrota, të udhëtojë deri në 740 km në një ditë me diell, ndërsa bateria mund të furnizojë gjithashtu një frigorifer, aparat kafeje dhe laptop në kabinën për dy persona.

“Sigurisht kur nuk ka diell, ne kemi një problem të vogël, por ne e projektuam makinën për ta karikuar atë edhe në rrjetin elektrik,” tha Lotte Van Dasler, një studente 23-vjeçare e inxhinierisë biomjekësore që ka kaluar vitin e fundit duke punuar në projekt.

Ajo është veçanërisht e kënaqur me sistemin e kombinuar të informacionit dhe argëtimit të automjetit, i cili ofron të dhëna në kohë reale për konsumin dhe prodhimin e energjisë, duke e detyruar shoferin të marrë në konsideratë me kujdes shkëmbimin midis përdorimeve të ndryshme.

Pa drejtimin elektrik ose frenim të asistuar, mjeti është i ndërlikuar për të manovruar në hapësira të ngushta, por mund të lundrojë rehat në autostradë me 120 kilometra në orë. Pas dy javësh në rrugë, grupi pret të mbërrijë në pikën më jugore të Tarifës të Spanjës më 15 tetor, përpara se të marrë makinën për të krijuar shfaqje dhe ekspozita nëpër Europë.

Edel Strazimiri / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.