Kompania amerikane e çelikut bëhet japoneze! – Biden tentoi të bllokonte shitjen, por pa sukses. Protestojnë sindikatat

Më shumë se 98% e aksionerëve të kompanisë ‘US Steel’ pranuan ofertën e dhjetorit të ‘Nippon’ prej 55 dollarësh për aksion, dukshëm më shumë se çmimi aktual i aksioneve. Një muaj më parë, presidenti amerikan Joe Biden bllokoi ofertën e kompanisë japoneze, duke thënë se US Steel duhet të mbetet në pronësi amerikane.

Kreu i Shtëpisë së Bardhë u shpreh se US Steel ka gëzuar statusin e një legjende në sektorin amerikan të çelikut për më shumë se njëqind vjet dhe ishte thelbësore që kompania të vazhdont të ishte një kompani amerikane e çelikut, në pronësi dhe menaxhim vendas.

Në dhjetor, Shtëpia e Bardhë tha se blerja e propozuar meritonte një shqyrtim serioz për shkak të rolit kyç të US Steel në prodhimin e çelikut, që do të thotë se është gjithashtu kritik për sigurinë kombëtare. Oferta është aktualisht në shqyrtim nga rregullatorët, duke përfshirë Komitetin për Investimet e Huaja.

Pranimi i ofertës japoneze në mbledhjen e aksionerëve u kritikua ashpër nga United Steelworkers – USW, nga frika e humbjeve të mundshme të vendeve të punës. Për të zbutur frikën e humbjeve të mundshme të vendeve të punës, Nippon tha se, në varësi të kushteve të caktuara, nuk do të pushonte nga puna apo do të mbyllte fabrikat e çelikut deri në shtator 2026.

Ata gjithashtu shtuan se do të zhvendosnin selinë e tyre në Pittsburgh. Nippon Steel mundi kompanitë amerikane Cleveland-Cliffs dhe Nucora dhe ArcelorMittal, me seli në Luksemburg, në garën për të blerë US Steel. Nga ana tjetër, Biden tha se ai ende qëndron në krah të sindikatave në çështjen e blerjes së një prodhuesi vendas të çelikut.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.