“Rimëkëmbja” ruse përmes gazit të lëngshëm – Shitjet në BE kompensojnë rënien në Azi
Europa është bërë “e pavarur” nga gazi natyror rus me një ritëm të shpejtë që nga lufta në Ukrainë. Rusia ka zëvendësuar tregjet e pasura perëndimore me dërgesa në Azi, veçanërisht Kinë dhe Indi.
Me ulje-ngritje, ky trend është krijuar që nga shpërthimi i konfliktit në Europë, megjithatë, tani analistët kanë gjetur një situatë krejtësisht të kundërt për LNG – gazin natyror të lëngshëm. Ndërsa dërgesat e këtij gazi natyror të lëngshëm po bien për klientët lindorë të Rusisë, vendet e kontinentit të vjetër po shtojnë blerjet e tyre.
Rusia ka rritur shitjet e saj të LNG jashtë vendit me 4.3%. Kjo statistikë erdhi pasi shitjet në Azi ranë 7%, ndërsa eksportet në Europë u rritën me 4%. Në këtë mënyrë, dërgesat e anijeve ruse në portet në Spanjë, Francë apo Belgjikë kaluan 5 milion ton në tremujorin e parë të 2024-ës. Një e dhjeta e gazit rus që më parë shkonte në BE nëpërmjet tubacioneve të gazit tani arrin përmes cisternave.
Deri në fund të vitit 2023, mbërritjet e gazit rus në Europë kishin rënë me 84% krahasuar me shifrat e vitit 2021. Vetëm 8% e këtij burimi arrin përmes tubacioneve të gazit, krahasuar me më shumë se 40% në “epokën e paraluftës”. Ky ndryshim erdhi paralelisht me dërgimin rutinë të anijeve të SHBA-së përtej Atlantikut për të furnizuar kontinentin.
Në fakt, SHBA-ja përbënte rreth 48% të furnizimit global të LNG në vitin 2023. Megjithatë, Rusia mbetet në vendin e tretë të dukshëm me 13%. Të paktën kështu ishte në tablonë e plotë për vitin 2023, por ekspertët kanë frikë se mund të rrisë pjesën e saj të tregut në muajt e ardhshëm, pavarësisht sanksioneve.
S&P Global publikoi një raport të fundit në të cilin bën të qartë se Europa do të vazhdojë të varet nga gazi rus. Sipas përllogaritjeve të kësaj organizate, varësia nga LNG-ja ruse është rritur tashmë nga 13% në 16% në tremujorin e parë të 2024-ës me 4.89 milion ton kundrejt totalit 33.65 milion të konsumuar nga kontinenti.
Kompania tregon për tre vende: Francën, Spanjën dhe Belgjikën, megjithëse më i dalluari është vendi Iberik, i cili mori 32% të të gjitha dërgesave nga Rusia.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.