Çmimet në rritje të arit – Çfarë fshihet pas “shkëlqimit” të fundit?
Javët e fundit çmimi i arit ka shënuar një rritje të fortë duke vendosur një nivel të ri historik. Çmimi i arit në prill 2023 ishte në 2.000 dollarë për ons dhe rreth këtyre niveleve për rreth gjithë vitin 2023.
Në janar 2024 arriti në 2.035 dollaë dhe papritur në javët e fundit çmimi u rrit, drejt niveleve të 2.350 dollarëve. Disa nga fitimet u nxitën nga optimizmi se Fed po i afrohej uljes së normave të interesit, pasi normat më të larta të interesit zakonisht funksionojnë negativisht për arin. Kostot më të ulëta të huamarrjes në përgjithësi favorizojnë arin, i cili nuk paguan interes dhe ‘shtrydhet’ kur normat e Fed janë të larta.
Rritja e inflacionit e viteve të fundit, por mbi të gjitha vlerësimi se vështirë se do të ketë një deskalim të madh të tij me shpejtësi, ndihmon në rritjen e çmimit të arit, pasi rritja e çmimit të arit është më shumë agresive në periudha presionesh inflacioniste.
Gjithashtu, përkeqësimi i zhvillimeve gjeopolitike në Ukrainë dhe Lindjen e Mesme rrit kërkesën për metalin e verdhë. Regjistrimi i niveleve të reja historike për arin shqetëson disa analistë, pasi ata besojnë se tensionet gjeopolitike dhe të dhënat makroekonomike nuk mund të justifikojnë një rritje kaq të madhe.
Analistët e Commerzbank, banka e dytë më e madhe në Gjermani, vlerësojnë se zhvillimet në tregun e arit kanë karakteristikat e një flluske racionale. Departamenti i mallrave të Commerzbank thekson se ka një divergjencë midis çmimit të arit dhe bazave dhe kjo nuk mund të vazhdojë përgjithmonë.
Megjithatë, analistët e JP Morgan “e shohin” çmimin e arit në 2.500 dollarë për ons, ndërsa analistët e Citi shfaqen më optimistë dhe e vendosin çmimin e arit në 3.000 dollarë për ons në 12 deri në 18 muajt e ardhshëm. Rritja e kërkesës nga bankat qendrore mund të shpjegojë në masë të madhe rritjen e çmimit të metalit të verdhë.
Blerjet e arit nga bankat qendrore kanë arritur nivele rekord në vitet e fundit pasi institucionet financiare kërkojnë të diversifikojnë zotërimet e tyre dhe të reduktojnë rreziqet e kreditit. Kina dhe Rusia janë blerësit kryesorë, të ndjekura nga India, Turqia dhe Brazili. Sipas një raporti të Këshillit Botëror të Arit, bankat qendrore në mbarë botën kanë tejkaluar për dy vite radhazi 1.000 ton blerje neto.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.