Rregulla të reja për nxjerrjen e mineraleve të rralla? – Kërkesa e 100 vendeve. Synohet parandalimi i dëmeve mjedisore

Një grup prej afro 100 vendesh i drejtuar nga Organizata e Kombeve të Bashkuara do të hartojë udhëzime të reja për të parandaluar disa nga dëmtimet mjedisore dhe abuzimet e të drejtave të njeriut që lidhen me nxjerrjen e mineraleve kritike.

Minierat për disa nga lëndët e para kryesore të përdorura në teknologjinë me karbon të ulët, si panelet diellore dhe automjetet elektrike, janë shoqëruar me abuzime të të drejtave të njeriut, punën e fëmijëve dhe dhunën, si dhe me dëme të rënda mjedisore.

Minierat e kobaltit, për shembull, kanë çuar në një rritje të shkeljeve të paligjshme të punës dhe të drejtave të njeriut, veçanërisht në Republikën Demokratike të Kongos. Minierat e bakrit kanë çuar gjithashtu në ndotje të rënda dhe dëmtime mjedisore në disa zona.

Zinxhiri global i furnizimit për minerale të tjera kritike, të tilla si mineralet e rralla të nevojshme për të prodhuar energji të rinovueshme, është gjithashtu një shqetësim në rritje për qeveritë pasi ato i zhvendosin ekonomitë e tyre në baza me karbon të ulët.

Antonio Guterres, sekretari i përgjithshëm i OKB-së, mblodhi së bashku një grup vendesh të zhvilluara dhe në zhvillim që merren me nxjerrjen dhe konsumin e mineraleve kritike për të hartuar një sërë udhëzimesh për industritë.

Ai u shpreh se një botë e fuqizuar nga energjia e rinovueshme është një botë e uritur për minerale kritike. Për vendet në zhvillim, mineralet e rralla janë një mundësi e mirë për të krijuar vende pune, për të diversifikuar ekonomitë dhe për të rritur në mënyrë ‘dramatike’ të ardhurat. Duke iu përgjigjur shqetësimeve se gara për lëndët e para ishte shkatërruese për disa, ai tha se kjo garë nuk mund të shkelë mbi të varfërit.

Udhëzimet e hartuara nga komiteti do të jenë vetëm vullnetare dhe ka të ngjarë të mbështeten shumë në kompanitë e mëdha që kontrollojnë zinxhirët e tyre të furnizimit.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.