Pronat, përfitimet nga digjitalizimi i Kadastrës – Ish-Kreu i Hipotekës, Pjetri: Lehtësohet procesi, shkurtohet koha për tapinë

Prej më shumë se tre vitesh, Agjencia e Kadastrës ka nisur punën për digjitalizimin e regjistrave kadastral. Por, nga të dhënat aktuale, rezulton që ky proces ka përfunduar për rreth 1.2 milionë pasuri.

Valdrin Pjetri, ish-kreu i Hipotekës rëndit arsyet që kanë ndikuar, duke vënë në duke se bëhet fjalë për një arkivë me 47 milionë fletë, që do të skanohen e do të kalojnë në sistem. Nga studio e emisionit  “Box to Box” Pjetri u ndal edhe tek përfitimet që kanë qytetarët nga digjitalizimi, që nga lehtësitë deri në shkurtimin e kohës për marrjen e shërbimit.

Pas reformës së ndërmarrë për ndarjen e tokës me ligjin 7501, ka nisur edhe procedura për regjistrimin fillestar. Ish-kreu i Hipotekës vuri në dukje se deri më tani procedurat e regjistrimit fillestar kanë përfunduar për pjesën më të madhe të territorit të Shqipërisë.

Sa i takon përditësimit apo përmirësimit të informacionit kadastral, Pjetri vuri në dukje se ky është një proces që inicionohet nga institucioni ose nga qytetarët dhe ka si qëllim që të shmang gabimet që janë bërë ndër vite sa i takon konfigurimit të këtyre pasurive.

Në rastin kur konstatohen parregullësi apo gabime të tjera atëherë ato korrigjohen nga Kadastra. Ndërsa, në rastin kur ka pretendime nga dy apo më shumë palë, apo mbivendosje atëherë vendimmarrja i takon gjykatës.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.