Konkurrencë e fortë mes bankave për kredinë për shtëpi – Normat e interesave të huave hipotekore, deri 1.8% më të ulëta se ecuria në vite
Ndërsa norma bazë e interesit është aktualisht në nivelin rekord prej 3.25%, ajo nuk po reflektohet në rritje të interesave të huave hipotekore. Madje përkundrazi, konkurrenca e fortë për këtë produkt mes bankave po i bën këto të fundit, të ulin ndjeshëm marzhet mbi normën referencë të bonove të thesarit 1 vjeccare.
Praktikisht, interesat e kredisë hipotekare për individë, të cilat janë të parametruara më ngushtë me yield-in 12-mujor dhe përçojnë në masë më të madhe ecurinë e tij, kanë qenë në rënie muajt e fundit.
Në tremujorin e tretë, interesi mesatar për kredinë hipotekore rezultoi 4.%, nga 4.3% që ishte në tremujorin e mëparshëm. Ndërkaq, diferenca e interesit të kredisë ndaj normës bazë ka zbritur në 3.6 pikë përqindje në tremujorin e tretë, nga mesatarja prej 5.4 pikë përqindje e pesë viteve të fundit.
Nëse këto dy marzhe nuk do të kishin ndryshuar nga mesataret e tyre të viteve 2017-2021, normat e interesit të kredisë do të ishin 0.8-1.8 pikë përqindje më të larta, duke reflektuar në një masë më të madhe rritjet e normës bazë të interesit.
Diferenca e interesave të kredisë hipotekore në raport me normën bazë të interesit është tregues i qartë që bankat po konkurrojnë fort për këtë produkt. Është Banka e Shqipërisë ajo që në analizën më të fundit që i bën trendeve të kreditimit thekson konkurrencën e fortë në sistemin tonë bankar për kredinë hiptekore.
Në kreditë e reja akorduar individëve në tremujorin e tretë, bankat vijuan të ulin marzhet mbi normat referencë, sikurse edhe në gjysmën e parë të vitit. Por, sipas Banikës së Shqipërisë, politikat lehtësuese të kreditimit kundrejt individëve, krahas elementit çmim u shprehën edhe në kushte të tjera joçmim më të favorshme, të tilla si: kërkesa më të ulëta për kolateral në kreditë hipotekare, si dhe në miratim të madhësive më të larta të kredive për individët.
Elementet e tjera joçmim, si komisionet, kushtëzimet nga marrëveshja e kredisë, si dhe maturiteti i kredisë mbetën të pandryshuara në tremujorin e tretë.
Lorenc Rabeta/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.