Konsumatorët rizbulojnë mënyrat e të blerit – Kriza e kostos së jetesës, terren për mallrat e përdorur

Kriza ekonomike, kriza pandemike, kriza inflacioniste dhe në sfondin e përgjithshëm kriza klimatike. Ky kuadër i krizës tashmë ka krijuar zakone konsumi krejtësisht të ndryshme nga ato që ekzistonin para vitit 2010, me ndryshimet që marrin karakter të përhershëm dhe jo të përkohshëm. Konsumatorët po rizbulojnë konceptin e marrëdhënies cilësi – çmim, duke iu drejtuar opsioneve më të lira të produkteve, nuk i kushtojnë më shumë rëndësi markës dhe nuk hezitojnë të blejnë mallra të përdorura, nëse janë të rinovuara apo të certifikuara për funksionimin e duhur të pajisjeve elektronike, apo qofshin ato veshje.

Këto tendenca të reja po shkaktojnë shqetësim në tregtinë me pakicë dhe industrinë tradicionale, pasi në fazën e parë shkaktojnë ulje të konsumit dhe humbje të të ardhurave, por nga ana tjetër krijojnë mundësi të reja biznesi, duke hapur fusha të reja aktiviteti. Sipas anketës më të fundit mbi zakonet e konsumit të familjeve, kriteret kryesore për të zgjedhur një supermarket si dhe një produkt konsumi janë çmimet, ofertat dhe cilësia që vijon në vendin e tretë. Për të fituar mbi konsumatorët, një produkt, sipas të njëjtit hulumtim, duhet të ketë një raport tërheqës cilësi – çmim. Në fakt, analistët e tregut argumentojnë se ky trend nuk është më i përkohshëm, por po bëhet i përhershëm. Sipas tyre shitësit me pakicë po kthehen në industrialistë.

Në kërkim të opsioneve më të favorshme, tashmë konsumatorët janë më pak besnikë ndaj markave, me këtë kriter që renditet shumë poshtë: i 9-ti nga 11 kriteret, për sa i përket zgjedhjes së produkteve të konsumit dhe i 12-ti nga 13 kriteret në zgjedhjen e një dyqani.

Ky trend shfaqet në një mënyrë tjetër dhe në kategori të tjera të tregtisë me pakicë, përtej asaj të sektorit ushqimor. Tregu i pajisjeve elektronike të përdorura, të rinovuara, kryesisht celularë dhe kompjuterë, po fiton gjithnjë e më shumë terren. Me konsumatorët e rinj që janë më të ndërgjegjshëm për mbrojtjen e mjedisit dhe çështjet e ekonomisë rrethore, krijohet terren pjellor edhe për shitjen e rrobave të përdorura. Dy nga grupet kryesore të veshjeve në botë, në fund të fundit, Inditex Zara dhe H&M, kanë krijuar platforma online përmes të cilave konsumatorët mund të shesin dhe blejnë rroba të përdorura.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.