Kosovës i mungon gruri – Fermerët mund të sigurojnë vetëm 50% të kërkesës në vend

Fermerët në Kosovë parashikojnë që nga fushata e korrjes së grurit do të sigurohen rreth 50% e kërkesës së popullsisë për ushqim. Për shkak të kushteve të pafavorshme klimatike dhe shtrenjtimit të çmimit të produkteve për mbrojtjen e bimëve, ata nuk janë në gjendje të garantojnë sasi dhe cilësi të duhur.

Por fermerët paralajmërojnë edhe vështirësi në furnizime nga importi për shkak të vazhdimit të luftës në Ukrainë, si dhe bllokimit të eksporteve nga Ukraina dhe Rusia. Si Rusia, ashtu edhe Ukraina janë ndër eksportueset më të mëdha të drithërave në botë dhe lufta mes tyre ka shkaktuar çrregullime në tregje. Procesi i korrjes së grurit në Kosovë ka filluar në fund të muajit qershor.

Sipas të dhënave zyrtare, në Kosovë nevojat për këtë produkt për kokë banori janë 204 kilogramë, që do të thotë se vendit i duhen 410 mijë ton grurë. Në vitin 2020, Kosova siguroi 341 mijë tonë grurë nga 80 mijë hektarë sipërfaqe të mbjella me këtë kulturë. Të dhënat për vitin e kaluar mungojnë. Për shkak të rritjes së çmimit të plehut artificial dhe derivateve të naftës, vjeshtën e kaluar janë zvogëluar sipërfaqet e tokës të mbjellura me grurë.

Gruri duhet të plehërohet dy herë. Gjatë këtij viti 100 kilogramë pleh artificial kushtojnë 100 euro, krahasuar me vitin e kaluar kur kushtonin 32 euro. Për një hektar tokë të kultivuar nevojiten deri në 300 kilogramë pleh.

Shtrenjtimi i plehut artificial dhe naftës ka bërë që edhe çmimi i grurit në treg të jetë më i lartë. Çmimi për një kilogram grurë është 30 cent edhe kjo vlerë, sipas fermerëve nuk është e leverdishme. Vitin e kaluar çmimi për një kilogram grurë ishte 19 cent. Në këtë pikë apeli i drejtohet qeverisë që të ndërmarrë hapa sa më të shpejtë për  të krijuar rezerva të hrurit, përndryshe vendi do të jetë në vështirësi të jashtëzakonshme.

Kosova nuk është shumë e varur nga importi i grurit nga Ukraina dhe Rusia, por vendet nga importohet ky produkt në Kosovë mund të kenë siguruar sasitë e duhura në këto shtete. Kosova sasinë më të madhe të grurit e importon nga shtetet e rajonit, përkatësisht nga Serbia. Për gjashtë muajt e këtij viti, sipas të dhënave të Doganës se Kosovës, vendi ka importuar 45 mijë tonë grurë, gjatë vitit 2021, 115 mijë tonë lloje të ndryshme të grurit dhe miellit dhe në vitin 2020. Serbia është shteti nga i cili Kosova importon sasinë më të madhe të grurit dhe miellit, pasuar nga Hungaria, Maqedonia e Veriut, Kroacia, Shqipëria, Bosnje e Hercegovina.

Për të ulur sasinë e importit të produkteve bujqësore dhe rritjen e rendimenteve Qeveria e Kosovës më 9 mars, ka ndarë 50 milionë euro për subvencionimin e sektorit të bujqësisë. Vetëm për subvencionimin e grurit janë ndarë 474 euro për hektarë – përfshirë këtu shpenzimet e plehut dhe të naftës.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.