Euro bie pranë nivelit të paritetit me dollarin – Kriza e mundshme energjetike në Europë, presion mbi monedhën 

Euro ka shkuar pranë nivelit të paritetit me dollarin amerikan në sesionin e sotëm, për herë të parë në 20 vitet e fundit, për shkak të shqetësimeve se kriza e energjisë do ta çojë Europën në recesion. Në anën tjetër, Rezerva Federale në SHBA vijon me politikën agresive të rritjes së interesave për ta “ftohur” inflacionin. Indeksi që mat ecurinë e dollarit amerikan, përballë monedhave kryesore ndërkombëtare, po qëndron në mbi 108, që gjithashtu është niveli më i lartë që nga tetori i vitit 2002.

Gazsjellësi i vetëm që transporton gaz nga Rusia drejt Gjermanisë, Nord Stream 1, filloi të hënën procesin e mirëmbajtjes vjetore dhe do të qëndrojë i mbyllur për të paktën 10 ditë. Por, qeveritë, tregjet dhe kompanitë janë të shqetësuar se Rusia mund ta shtyjë akoma më shumë mbylljen e gazsjellësit për shkak të luftës në Ukrainë.

Situata e pasigurt në Europë ka ulur edhe bastet për fushatën shtrënguese të politikave monetare nga Banka Qendrore Europiane, ndërsa Banka e Japonisë është angazhuar në mënyrë të përsëritur për stimuj të jashtëzakonshëm. Rezerva Federale është banka qëndrore që po vijon me politikat shtrënguese dhe në takimin e këtij muaji, pritet të rrisë normën bazë të interesit me 75 pikë bazë për herë të dytë me radhë. Në tregun e kriptomonedhave, vijon tendenca në rënie, me bitcoin që ka zbritur poshtë 20 mijë dollarëve. Ndërsa ethereum po tregtohet në rreth 1080 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.