Kriza e strehimit në Spanjë – Numri i të pastrehëve rritet paralelisht me atë të turistëve

Dorina Kurtaj /SCAN

Një numër në rritje i spanjollëve po përballen me të qënurit të pastrehë si pasojë e mungesës së banesave sociale dhe rregulloreve që pengojnë qiratë afatgjatë. Situata është përkeqësuar nga një ‘boom’ i lejeve për pushime në platforma të tilla si Airbnb dhe Booking.com, e cila ka nxitur një valë protestash në të gjithë vendin javët e fundit.

Shkalla e të pastrehëve është rritur me 24% që nga viti 2012 në 28.000 njerëz, sipas statistikave zyrtare, ndërsa, sipas një raporti të Bankës së Spanjës, rreth 45% e njerëzve që jetojnë në strehim me qira janë në rrezik të varfërisë ose përjashtimit social, duke shënuar përqindjen më të lartë në Europë.

Të pastrehët janë rritur ndjeshëm në të gjithë Europën gjatë dekadës së fundit, por shtrirja e problemit në Spanjë është ‘maskuar’ nga të rinjtë spanjollë që zgjedhin të jetojnë më gjatë me prindërit e tyre. Më shumë se 60% e 18-34-vjeçarëve jetojnë në shtëpinë e familjes dhe Spanja ka normën më të shpejtë në rritje të të rinjve që jetonin me prindërit e tyre midis ekonomive kryesore europiane midis 2008 dhe 2022. Stoku i banesave sociale në Spanjë është vetëm 1.5% e të gjitha shtëpive krahasuar me një mesatare evropiane prej 9%. Konkurrenca për apartamente me qira private është e ashpër. Rreth 40 persona i përgjigjen çdo listimi që del në treg në Madrid, sipas faqes së internetit të listave të pronave Idealista.

Plani aktual i qeverisë socialiste për banesat publike do të shtojë 184.000 njësi gjatë tre viteve të ardhshme. Kryeministri Pedro Sanchez tha në maj se do të dëshironte që stoku i banesave sociale të përputhej me mesataren europiane gjatë mandatit të tij që përfundon në 2027. Por Banka e Spanjës vlerëson se nevojiten edhe 1.5 milionë shtëpi të tjera për të arritur këtë objektiv. Sipas të dhënave zyrtare, ritmi prej 90.000 njësi në vit i ndërtimit të shtëpive është në rënie të rritjes së kërkesës dhe shumë më poshtë se 650.000 shtëpitë e ndërtuara në vitin 2008. Qytetet e mëdha si Madridi gjithashtu duhet të përballen me migrimin nga fshati drejt qendrave urbane ku janë vendet e punës. Rreth 48.000 njerëz janë në listën e pritjes për strehim social në kryeqytetin spanjoll.  Pronarët po kërkojnë garanci për pagesën e qirasë nga qiramarrësit që më të varfërit nuk mund t’i japin, sipas tre OJQ-ve të konsultuara nga Reuters. Kriza është aq e mprehtë sa qytetet spanjolle po përpiqen të kufizojnë ose të heqin gradualisht apartamentet për pushime.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.