Kriza ushqimore/ BE: Ka ‘shpresë’ për një marrëveshje Rusi-Ukrainë për eksportin e grurit!

Bashkimi Europian shpreson se një marrëveshje midis Ukrainës dhe Rusisë mbi eksportet e drithit mund të arrihet këtë javë.

Negociatorët nga të dy vendet u takuan javën e kaluar në Stamboll, Turqi, së bashku me përfaqësuesit e OKB-së për të gjetur një marrëveshje për të lejuar eksportimin e miliona tonë drithërave ukrainas të bllokuara aktualisht në portet e Detit të Zi. Ata janë planifikuar të takohen sërish në Turqi këtë javë.

Për kryediplomatin e BE-së, Josep Borrell, “kjo mund të jetë gjëja më e rëndësishme me të cilën po përballet komuniteti ndërkombëtar. Gjëja më shqetësuese është mungesa e ushqimit në shumë vende të botës.”

Blloku 27-vendesh dhe partnerët e tij perëndimorë kanë akuzuar Moskën për përdorimin e ushqimit si armë dhe për shënjestrimin e qëllimshëm të infrastrukturës bujqësore të Ukrainës.

Si Ukraina ashtu edhe Rusia kanë akuzuar njëra-tjetrën për minat e Detit të Zi për të parandaluar palën tjetër nga nisja e sulmeve, gjë që ka kontribuar kryesisht në ndalimin e eksporteve pasi shumica dërrmuese e drithërave ukrainas eksportoheshin më parë nëpërmjet Detit të Zi.

Borrell, i cili foli me gazetarët përpara një takimi të ministrave të punëve të jashtme të BE-së në Bruksel, tha se blloku “po bën gjithçka që mundet për të mbështetur këto drithëra përmes mënyrave të tjera, përmes korsive të solidaritetit, përmes Detit të Zi në Rumani, Bullgari. Por kjo nuk mjafton.”

“Kështu që unë shpresoj dhe mendoj se kam një shpresë, se këtë javë do të jetë e mundur të arrihet një marrëveshje për të zhbllokuar Odesën dhe portet e tjera të Ukrainës. Jeta e 1000, më shumë se 1000, dhjetëra mijëra njerëzve varet nga kjo marrëveshje. Pra, kjo nuk është një lojë diplomatike, është një çështje e jetës dhe vdekjes për shumë qenie njerëzore.”

“Rusia duhet të zhbllokojë dhe të lejojë eksportimin e grurit ukrainas. Përndryshe, ne do të duhet të vazhdojmë të pretendojmë se ata po përdorin ushqimin si armë pa asnjë lloj konsiderate për jetën e qenieve njerëzore. Duhet thënë me zë të lartë,” shtoi ai.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.