Kuba hapet ndaj dollarit – Vendi miraton dhe mekanizmin e shitblerjes

Qeveria kubane deklaroi se shteti do të fillojë blerjen e dollarëve dhe valutave të tjera, si hapi i parë për të vendosur, në një datë ende të pacaktuar, edhe shitjen e tyre në popullsi.

Mediat kubane e theksojnë këtë aspekt të fundit si një risi absolute, sepse blerjet e valutës me para në dorë nga popullata në sistemin bankar publik nuk janë autorizuar asnjëherë.

Lidhur me këtë, gjatë emisionit ‘Mesa Redonda’ në televizionin shtetëror, presidentja e bankës qendrore, Marta Sabina Uilson González, saktësoi se kursi i këmbimit do të jetë 120 pesos kubane – kupa – për çdo dollar, ndërsa për euron, banka do të ofrojë 119.69 kupë. Aktualisht çmimi i monedhës amerikane është ruajtur artificialisht në nivelin 24 pesos kubane për dollar.

Vitin e kaluar Kuba i dha fund sistemit të valutës së dyfishtë e cila ekzistonte që nga viti 1994 dhe sipas shumë personave ishte shndërruar në një kufizim të madh për ekonominë kubane por dhe krijonte pabarazi të madhe në vend. Sistemi ishte miratuar pas rënies së Bashkimit Sovjetik, kur Kuba u përball me një krizë të rëndë ekonomike të shkaktuar nga zhdukja e qeverive që kishin qenë prej shumë vitesh blerësit e prodhimeve të vendit.

Për një periudhë në vend u lejua përdorimi i dollarit si valutë paralele. Për të shmangur faktin që qarkullimi i dollarit të rritej ndjeshëm dhe të krijonte probleme, qeveria kubane vendosi ta zëvendësonte me një monedhë të së njëjtës vlerë por kubane.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.