Kufizohen afatet për centralet e energjisë – Vendimi: Brenda 6 muajsh nga miratimi paraprak, të dorëzohen të gjithë studimet e dokumentet
Nje vendim i fundit i qeverisë ka kufizuar afatet për plotëismin e dokumentacionit nga kompanitë që investojnë në centrale të prodhimit të energjisë. Sipas rregullave të reja, studimet dhe dokumentete duhet të dorëzohen brenda 6-muajsh nga miratimi paraprak.
Të gjithë investitorët që do pajisen me miratimin paraprak për ndërtimin e burimeve të reja të prodhimit të energjisë, që nuk janë objekt koncesioni, do të duhet që të përfundojnë matjet ose studimet e lidhura me investimin brenda një periudhe 6-mujore.
Gjithçka përcaktohet në ndryshimet ligjore, të bëra nga qeveria pak ditë më parë, duke ndryshuar praktikën aktuale që nuk vendoste limite kohore në këtë drejtim. Po ashtu, brenda 6 muajsh kompanitë do të duhet të depozitojnë edhe të gjithë dokumentet shtesë të kërkuara, sikurse është studimi i plotë të fisibilitetit teknik, ekonomik, financiar, mjedisor e social, bazuar në të dhëna dhe matje reale, të kryera në zonat e zbatimit të projektit.
Në dokumente përfshihet edhe plani i biznesit të projektit; grafikun e zbatimit të projektit; miratimin e OST-së ose OSSH-së për pikën e lidhjes me rrjetin e transmetimit ose të shpërndarjes, lejet, licencat dhe autorizimet paraprake mjedisore, etj. Paralelisht, vendimi i ri i qeverisë përcakton se “opinioni paraprak i OST-së ose OSSH-së në fazë e studimit të parafizibilitetit shërben vetëm për të përcaktuar mundësinë e lidhjes në rrjet.
Ky opinion nuk angazhon OST-në ose OSSH-në për rezervimin e kapaciteteve të rrjetit, deri në pajisjen e subjekteve me miratim paraprak nga ministri sipas këtij vendimi. Një tjetër risi, që lidhet me ndërtimin e kapaciteteve të reja prodhuese të energjisë lidhet edhe me dorëzimin e dokumentacionit ligjor, që provon marrëdhënien afatgjatë mbi pasurinë që do të përdoret për ndërtimin e burimit gjenerues.
Sipas vendimit, kërkesa refuzohet në rastet kur pasuria ku propozohet ndërtimi ka kufizime shfrytëzimi, në përputhje me legjislacionin për mbrojtjen e tokës bujqësore dhe zonave të mbrojtura.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.