“Kuvendi, dëgjesë për problemet me e-Albania” – Kreu i Komisionit të Ekonomisë, Shalsi: Në fokus, vonesat për ngritjen e call center

Komisioni parlamentar për Ekonominë dhe Financat do të thërrasë në dëgjesë përfaqësuesit e qeverisë, në lidhje me vonesën e krijuar për ngritjen e call center-it, që duhet të asistojë qytetarët për marrjen e shërbimeve në portalin qeveritar e-albania”.

Pas problemeve të shumta, që qytetarët kanë hasur për shkak të mbylljes së sporteleve fizike dhe pamundësisë për të aksesuar portalin, kreu i komisionit Eduard Shalsi, bën me dije për TV SCAN se ngritja e call center-it është pasuar me diskutime, për shkak të specifikave të shërbimit që do të ofrojë.

Gjithsesi, sipas Shalsit vendimi për mbylljen e menjëhershme të sporteleve ishte i duhuri, pavarësisht pengesave të krijuara.

Prej datës 1 maj, shërbimet publike që ofroheshin në zyrat dhe sportelet fizike të institucioneve shtetërore duhet të merren vetëm në mënyrë elektronike, përmes portalit qeveritar e-albania. Por, ky vendim i qeverisë është pasuar me një sërë problemesh teknike, që kanë pamundësuar marrjen e shërbimeve.

Nga ana tjetër, shumë qytetarë e kanë të pamundur të përdorin portalin, për shkak të njohurive të pakta në këtë fushë, çka ka nxitur drejtimin e tyre në qendrat e internetit. Për këtë arsye, qeveria premtoi ngritjen e call centerit për të asistuar qytetarët, por deri më tani ajo nuk është funksionale.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.