Kyçja e sporteleve 10-fishon kostot e regjistrimit në kopsht – Shtohen pengesat për familjet rome, fëmijët rrezikojnë arsimimin
Teksa dërgimi në kopsht i fëmijëve të komunitetit rom prej kohësh është një sfidë, këtë vit ata po përballen edhe me një pengesë shtesë, që është mbyllja e sporteleve fizike dhe kalimi i të gjitha shërbimeve publike online. Për t’u regjistruar në kopsht, çdo fëmijë duhet të dorëzojë disa dokumente që tashmë mund të shkarkohen vetëm nga kompjuteri, një veprim që për Etlevën, e cila e fiton jetesën duke mbledhur kanoçe është tërësisht i pamundur.
Etleva thotë se regjistrimi në një institucion arsimor është vendimtar për të ardhmen e mbesës së saj, që aktualisht ndan çatinë e të njëjtës barake me prindërit dhe gjyshërit e saj.
Fatmir Zyberi, aktivist në Qendrën për Advokim Social, thotë se kalimi i shërbimeve online ka 10-fishuar kostot për marrjen e dokumenteve të nevojshme për t’u regjistruar në çerdhe apo kopshte.
Sipas tij, kjo situatë po rrezikon përpjekjet shumëvjeçare për orientimin e fëmijëve romë drejt arsimimit, teksa edhe në programin e qeverisjes 2017-2021 u premtua se 100 për qind e fëmijëve romë dhe egjiptianë do të regjistroheshin dhe do të mbaronin arsimin e detyruar 9-vjeçar e madje një pjesë e mirë edhe universitetin.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.