Lojërat Olimpike ulin çmimet e qirave në Paris – Mungesa e rezervimeve konsiderohet e pazakontë

Vetëm rreth 1/3 e apartamenteve me qira të disponueshme të Airbnb për zonën e Parisit janë rezervuar deri më tani gjatë Lojërave Olimpike, sipas grupit të analitikës së të dhënave AirDNA, ndërsa 3.000 deri në 3.500 listime të reja vijnë në internet çdo muaj.

Shumë parizienë planifikojnë të largohen nga qyteti gjatë lojërave, të cilat fillojnë më 26 korrik, pasi sipas zyrtarëve të turizmit pritet të vizitojnë kryeqytetin 15 milionë njerëz. Megjithatë, planet për t’u dhënë me qira shtëpitë e tyre turistëve me çmime të larta gjatë sezonit të festave të gushtit të shenjtë të Francës janë prishur pasi oferta tejkalon kërkesën.

Çmimi mesatar është 150 euro nata, por për dy javë e gjysmë të Olimpiadës ky çmim shkon në 250 euro. Mungesa e rezervimeve duket e pazakontë për atë mendohej se do të ishte një periudhë e kërkesës së lartë. Airbnb, e cila është gjithashtu një partner zyrtar për Olimpiadën, mbetet optimiste për mundësinë që u ofron vizitorëve.

Dhjetëra mijëra mikpritës të rinj kanë regjistruar strehim në qytetet që presin ngjarje olimpike nga fillimi i vitit 2023, sipas kompanisë. Një studim i Deloitte i porositur nga kompania vlerëson se pritësi mesatar në zonën e Parisit do të gjenerojë 2.000 € të ardhura shtesë gjatë lojërave. Mijëra njerëz në qytetet pritëse hapën shtëpitë e tyre për herë të parë dhe më shumë se gjysma e listimeve të rezervuara e bënë këtë në më pak se shtatë ditë.

Megjithatë, sigurimi i këtyre rezervimeve mbetet i vështirë pasi sasia e dhomave të hoteleve të caktuara më parë për misionet olimpike janë gjithashtu në treg. Hotelet gjithashtu kanë filluar të ulin çmimet ndërsa konkurrojnë për klientë. Ndërsa Londra ndërtoi rreth 7.000 dhoma të reja hoteli për Lojërat Olimpike 2012, Parisi ka shtuar vetëm rreth 2.000 dhoma.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.