Lufta në Ukrainë, Norvegjia përfiton – Kompania më e madhe energjetike në vend regjistroi 60 miliardë euro fitime plus

Lufta në Ukrainë ka rritur fitimet për kompanitë e naftës dhe të gazit, duke shkaktuar shumë debate rreth mënyrës që duhen përdorur këto të ardhura. Tremujori i dytë i vitit 2022 shënoi trefishimin e fitimit neto të gjigantit norvegjez të lëndëve djegëse fosile Equinor, në pronësi të shtetit: nga 1.9 miliard dollar në tremujorin e dytë të vitit 2021 në 6.8 miliard dollarë në tremujorin e dytë të këtij viti.

Kryeministri polak Mateus Moraviecki u shpreh qartë se Norvegjia, nëpërmjet çmimeve të larta të energjisë po përfiton nga lufta. Vetë autoritetet konfirmojnë se Norvegjia fiton 60 miliard euro më shumë këtë vit nga nafta dhe gazi, por njëkohësisht ka shtuar mbështetjen ndaj Ukrainës vetëm me 1 miliard euro.

Këtë vit të ardhurat norvegjeze që vijnë nga nga nxjerrja e lëndëve djegëse fosile mund të arrijnë deri në 97 miliard dollarë, më shumë se trefishi në krahasim me një vit më parë. Pjesa më e madhe e të ardhurave do të jetë për fondin sovran norvegjez në mbështetje të vendit në momentin që nafta do të ketë mbaruar.

Vendi është përfshirë në një debat të fortë rreth mundësisë për të treguar më shumë solidaritet dhe për të shpenzuar paratë në vend që t’i ruajë për të ardhmen kur nafta skandinave të ketë mbaruar.

Ndërkohë kanë rinisur punimet për ndërtimin e një gazjellësi nënujor mes Norvegjisë dhe Polonisë. Baltic Pipe do të jetë pjesërisht aktiv këtë vjeshtë ndërsa në janar të vitit 2023 do të jetë në funksion të plotë

Norvegjia i është përgjigjur kërkesave europiane për gaz, duke iu dhënë operatorëve leje për të prodhuar më shumë ndërkohë që projekte të tjera janë në zbatim e sipër. Projekte që mund të shkaktojnë një problem tjetër: përshpejtimin e ndryshimeve klimatike.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.