Maqedonia e Veriut zgjedh presidentin e ri – Në garë edhe dy kandidatë shqiptarë, Osmani dhe Taravari

Sot në Republikën e Maqedonisë së Veriut mbahen zgjedhjet presidenciale. Votuesit do të kenë mundësi të zgjedhin një nga shtatë kandidatët për President të Republikës ku dy prej tyre janë shqiptarë, Bujar Osmani, nga Fronti Europian dhe Arben Taravari nga koalicioni VLEN.

Ndërkohë vendi muajin e ardhshëm do të mbajë edhe zgjedhjet parlamentare, në të cilat opozita nacionaliste do të përpiqet të rrëzojë socialdemokratët e qendrës së majtë në pushtet.

Në përballjen e kësaj të mërkure janë dhe presidenti aktual i vendit Stevo Pendarovski, kandidat i socialdemokratëve pro-europianë, kundër Gordana Siljanovska-Davkova nga opozita VMRO DPMNE.

VMRO DPMNE ka fituar terren në vitet e fundit mbështetur në zemërimin e publikut për ritmin e ngadaltë të pranimit të vendit ballkanik në Bashkimin Europian. Ndërsa presidenca është një post ceremonial, opozita shpreson të fitojë terren për zgjedhjet e rëndësishme parlamentare në maj.

Siljanovska-Davkova e opozitës pritet të marrë 19.2% të votave dhe Pendarovski 9.7%, sipas sondazheve të publikuara nga TV shtetëror i Maqedonisë së Veriut. Bujar Osmani, kandidat i BDI-së, parashikohet të jetë i treti me 6.6%.

Vendvotimet do të mbyllen në orën 19:00. Rezultatet e para priten mbrëmjen e së mërkurës. Nëse asnjëri nga kandidatët nuk merr shumicën në raundin e parë, balotazhi do të mbahet më 8 maj.

Kandidatura e Maqedonisë së Veriut për t’u anëtarësuar në BE u prit me optimizëm në vitin 2005, por 19 vjet më vonë, ajo ka bërë pak përparim, pjesërisht për shkak të kundërshtimit nga anëtarët e BE-së, Greqisë dhe Bullgarisë.

Një marrëveshje e vitit 2017 për ndryshimin e emrit të vendit nga Maqedoni në Maqedoni e Veriut i dha fund mosmarrëveshjes me Greqinë, por Bullgaria vendosi një veto në vitin 2020 mbi çështjet e historisë dhe gjuhës, që shumë maqedonas të Veriut thonë se sulmojnë identitetin e tyre kombëtar.

Në vitin 2001, NATO e tërhoqi Maqedoninë e Veriut nga pragu i luftës civile gjatë një kryengritjeje etnike shqiptare dhe premtoi integrim më të shpejtë në BE dhe NATO. Vendi iu bashkua NATO-s në vitin 2020.

Dorina Kurtaj /SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.