Mbi 18 mijë fermerë marrin naftën brenda dy muajve – Ministrja Krifca: Premtim i mbajtur për ta realizuar brenda datës 2 qershor

Për vetëm dy muaj nga mbyllja e aplikimeve mbi 18 mijë fermerë në gjithë vendin kanë marrë naftën falas nga Skema Kombëtare e Mbështetjes. Në një takim me fermerë në Armen të Vlorës, Ministrja e Bujqësisë dhe Zhvillimit Rural, Frida Krifca tha se angazhimi i marrë për disbursimin sa më të shpejtë të fondit te fermerët, është një nevojë e plotësuar tashmë për këtë hallkë të bujqësisë shqiptare. Ministrja bëri me dije se po punohet ende në këtë drejtim, pasi është shtuar edhe fondi tjetër për naftën me paketën e rezistencës sociale prej 500 milionë lekë për punimet e mekanizuara të fermës.

Kjo mbështetje ka qenë edhe një shtysë më shumë për fermerët e Armenit, të cilët janë një shembull i qartë i punës në kooperim. Rreth 17 prej tyre, kryesisht fermerë të rinj në moshë janë bërë bashkë për të prodhuar në një sipërfaqe toke gati 100 hektarë. Kulvitojnë foragjere, që i shërbejnë blegtorisë. Duke vlerësuar këtë iniciativë, ministrja tha se këto janë elementët kryesorë që i duhen bujqësisë, e cila gjithmonë e më shumë  duhet të përqafohet nga rinia.

Ministrja Krifca bëri me dije hyrjen në fuqi të ligjit për grupet vendore të veprimit, i cili është një mekanizëm tepër benefit për fermerët në gjithë vendin, duke iu dhënë mundësinë e financimit edhe për të realizuar ndërhyrje të nevojshme në komunitetet rurale ku do të veprojnë.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.