“Më shumë transparencë për borxhet e brendshme” – Malpass: Ristrukturim i borxhit sovran për shumë vende në vështirësi
Analizat e qëndrueshmërisë së borxhit të kryera nga Banka Botërore dhe Fondi Monetar Ndërkombëtar duhet të pasqyrojnë peshën në rritje të borxhit të brendshëm në nivelet e përgjithshme të borxhit të shumë vendeve në zhvillim, u shpreh presidenti i Bankës Botërore, David Malpass. Malpass bëri thirrje për masa urgjente për të nisur përpjekjet për ristrukturimin e borxhit sovran për shumë vende që janë në vështirësi ose afër kufirit, pas vitesh përparimi të zbehtë nën Kornizën e Përbashkët të Grupit 20.
Malpass tha se është e vështirë të kuptohen më mirë nivelet totale të borxhit të vendeve, duke përfshirë borxhin e brendshëm dhe atë të jashtëm. Borxhi i brendshëm tani përbën rreth 20% të produktit të brendshëm bruto të vendeve me të ardhura të ulëta, nga 9% një dekadë më parë. Për vendet me të ardhura mesatare, kjo përqindje është “në 45% të PBB-së”, tha ai, duke shtuar se analizat aktuale të borxhit nuk i jepnin peshën e duhur borxhit të brendshëm, i cili gjithashtu shpesh ishte më pak transparent. Në përgjithësi, ai tha se dekada e fundit kishte pasur rritjen më të shpejtë të borxhit në 50 vitet e fundit – një zhvillim shqetësues duke pasur parasysh potencialin më të ulët të rritjes dhe inflacionin më të lartë.
Carmen Reinhart, kryeekonomistja e mëparshme e Bankës Botërore, tha se kishte shqetësime të vazhdueshme për “borxhin e fshehur” dhe transparencën e niveleve të borxhit të jashtëm, duke përfshirë “nivelet e borxhit të nën-raportuara” të Kinës, tani kreditori më i madh dypalësh në botë.
Ajo tha se nuk kishte të dhëna të disponueshme publikisht për rezervat neto dhe pyetjet në lidhje me detyrimet kontingjente komplikuan gjithashtu problemin e analizimit të saktë të niveleve të borxhit. “Ne kemi shumë punë për të bërë për të përmirësuar të kuptuarit e stokut të borxhit,” tha ajo, duke vënë në dukje se pjesa e borxhit e mbajtur ‘fshehur’ gjithashtu ishte rritur ndjeshëm vitet e fundit.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.