Meta pushon nga puna për të tretën herë në më pak se tre muaj!

Meta ka nisur një tjetër raund pushimesh nga puna mes “vitit të efikasitetit” të kompanisë. Shkurtimet e fundit të vendeve të punës janë raundi i tretë i një serie shkurtimesh të shpallura për herë të parë në mars. Kompania tha se priste të largonte gjithsej 10,000 vende pune gjatë tre raundeve.

Është e paqartë saktësisht se sa punëtorë janë ndikuar nga raundi i fundit, por pushimet nga puna, edhe një herë, duket se janë kryesisht në role jo inxhinierike. Njerëzit në marketing, komunikim dhe rekrutim kanë humbur punën e tyre, sipas Reuters, i cili citoi postimet në LinkedIn. Meta gjithashtu do të shkurtojë rreth 500 vende pune nga zyra e saj irlandeze, rreth 20 % e fuqisë punëtore në vend, sipas një raporti të veçantë.

Një zëdhënës vuri në dukje një memorandum që Mark Zuckerberg ndau me punonjësit vjeshtën e kaluar kur kompania kreu një raund të hershëm prej 11,000 pushimesh nga puna. Në mesazh, ai tha se kushtet ekonomike “kanë bërë që të ardhurat tona të jenë shumë më të ulëta” se sa pritej. Ai i përshkroi shkurtimet e vendeve të punës si “disa nga ndryshimet më të vështira që kemi bërë në historinë e Metës” dhe “ajo që na nevojitet për të ecur përpara”.

Zuckerberg ka folur hapur për nevojën për më shumë “efikasitet” në muajt që pasuan. Ai e quajti vitin 2023 si “viti i efikasitetit” të Metës dhe tha se dëshiron të krijojë një strukturë menaxheriale “më të sheshtë” në kompani. “Vazhdoj të besoj se ngadalësimi i punësimit, rrafshimi i strukturës sonë të menaxhimit, rritja e përqindjes së kompanisë sonë që është teknike dhe prioritet më rigoroz i projekteve do të përmirësojë shpejtësinë dhe cilësinë e punës sonë,” tha ai gjatë publikimit më të fundit të fitimeve të kompanisë.

Përfundimi i raundit të fundit të pushimeve nga puna e çon numrin total të punëtorëve që Meta ka shkurtuar në rreth 21 mijë që nga nëntori i kaluar. Megjithëse pushimet nga puna të Metës kanë qenë ndër më të lartat në industri, ajo është larg nga e vetmja kompani teknologjike që ka lënë punë gjatë disa muajve të fundit. Amazon, Google, Microsoft dhe dhjetëra të tjerë kanë tkurrur në mënyrë dramatike fuqinë e tyre të punës që nga fillimi i vitit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.