“Minierat e reja”, lejet që do jepen në 3 vite – Plani 2022-2024/ Leje shfrytëzimi për 62 zona minerare, 16 më pak se 3-vjeçari paraardhës

Zhvillimi i aktivitetit minerar në 3 vitet e ardhshëm do të fokusohet në nxjerrjen e gurit gëlqeror, gurit dekorativ dhe gurit gëlqeror të mermerizuar. Pas miratimit në qeveri të dokumentit që orienton zhvillimin e sektorit për periudhën 2022-2024 është zbardhur programi i plotë, në bazë të të cilit parashikohet hapja e procedurave konkurruese apo zhvillimi i proceduarve të hapura për 62 zona minerare.

Ndërkaq, do të nevojitet miratimi i planin vjetor minerar, për të përcaktuar se cilat prej tyre do të kalojnë në procedure konkurruese, dhe cilat do të jenë zonat të hapura.  Në ndryshim nga programi i deritanishëm, që përcaktonte se kjo ndarje bëhej në bazë të vlerësimit të strukturave përgjegjëse (AKBN, SHGJSH) dhe në përputhje me kërkesat e tabelës për vlerën minimale të sipërfaqes së zonës së lejuar minerare dhe atyre të investimit, në 3-vjeçarin e ardhshëm ky përcaktim do të mbështetet në hartën minerare digjitale. Forma e marrjes së lejes minerare ka rëndësi të veçantë në drejtim të tansferimit të saj.

Kjo pasi, sipas ndryshimeve të fundit ligjore lejet minerare që janë dhënë me procedura konkurruese do të mund të transferohen pas një periudhe 5-vjeçare nga data e dhënies së lejes, ndërkohë që për lejet e tjera, nuk nevojitet kalimi i një periudhe të caktuar. Ndërkaq, referuar programit të ri pjesa më e madhe e lejeve minerare që do të jepen për këto zona janë pikërisht për mineralet e mësipërm, ndërkohë që vetëm një numër shumë i kufizuar pritet të jepet për nxjerrjen e mineralit të kromit.

Për këtë të fundit, planifikohet  dhënia e 2 zonave minerare, ndërsa 3 zona të tjera do të jepen për mineralin e bakrit. Në krahasim me planin 2019-2021 ka një reduktim të zonave minerare, pasi plani për 3-vjeçarin që lamë pas përcaktonte hapjen e garave konkurruese për 78 zona  minerare, apo 16 më shumë se ai aktual. Ndërkohë që, sa i takon rritjes së produktit vjetor, parashikohet të mos ketë ndryshime, duke qëndruar në deri 5%.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.