Minimumi jetik në 200 euro? – Propozimi i opozitës shkakton debate në komisionin parlamentar të Punës

Një grup deputetësh të opozitës kanë prezantuar në Komisionin parlamentar për Punën, Çështjet Sociale dhe Shëndetësinë, nismën për përcaktimin e minimumit jetik. Minimumi jetik është shuma monetare e disa produkteve ushqimore, të përshtatshme për të siguruar funksionimin normal të trupit të njeriut dhe ruajtjen e shëndetit, shoqëruar me një numër të vogël artikujsh jo-ushqimorë apo shërbimesh të nevojshme për të përmbushur nevojat bazë social-kulturore.

Shqipëria është i vetmi vend në Evropë që nuk e ka të përcaktuar me ligj minimumin jetik. Sipas raportit më të fundit të publikuar nga Avokati i Popullit, vlera e minimumit jetik duhet të jetë rreth 190 mijë lekë për frymë, por duke marrë në konsideratë shifrat rekord të inflacionit në vitin 2022 dhe rritjen e çmimeve për produktet e shportës, deputetët propozojnë që minimumi jetik të jetë 200 euro.

Deputetët vlerësojnë se ky minimum vlen edhe për kategoritë e tjera, për pensionet urbane dhe rurale, pagesën e papunësisë, paaftësisë, ndihmën ekonomike, të cilat janë të gjitha poshtë 200 euro.

Të dhënat nga Open Data Albania tregojnë se gati gjysma e popullsisë jeton në varfëri, ndërkohë që është rritur edhe varfëria absolute. Më shumë se 32% e popullsisë, konkretisht mbi 900 mijë qytetarë janë të ekspozuar ndaj pasigurisë ushqimore.

Për të përballuar jetesën, shumë familje shqiptare mbështeten nga remitancat, ku këto të fundit arritën vlerën 930 milionë euro gjatë vitit 2023, 11.3% më tepër krahasuar me vitin 2022.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.