“Monedhat digjitale mund të zëvendësojnë paratë” – Sipas FMN, Bankat Qendrore nuk do të kthehen prapa në kohë

Monedhat digjitale të bankës qendrore kanë potencialin për të zëvendësuar paratë cash, por përshtatja mund të marrë kohë. Deklarata u bë nga drejtoresha e Fondit Monetar Ndërkombëtar, Kristalina Georgieva. Ajo theksoi se këto monedha mund të zëvendësojnë paratë, të cilat janë të kushtueshme për t’u shpërndarë në ekonomitë e ishujve. Sipas saj ato mund të ofrojnë elasticitet në ekonomitë më të përparuara dhe mund të përmirësojnë përfshirjen financiare atje ku pak njerëz kanë llogari bankare.

Monedhat digjitale të bankave qendrore fuqizohen nga teknologjia blockchain, duke lejuar këto banka të kanalizojnë pagesat e qeverisë drejtpërdrejt te familjet. Kreu i FMN – së shtoi se këto monedha do të ofronin një alternativë të sigurt dhe me kosto të ulët. Ato gjithashtu do të ofronin një urë për të shkuar midis parave private dhe një matës për të matur vlerën e tyre, ashtu si paratë cash sot që mund t’i tërheqim nga bankat tona.

FMN ka thënë se më shumë se 100 vende po eksplorojnë monedhat digjitale të bankave qendrore – ose afërsisht 60% e vendeve në botë. Sipas një raporti të fundit niveli i interesit global për këto monedha është i paprecedentë. Disa banka qendrore kanë nisur tashmë projektet pilot ose kanë prezantuar monedhën e tyre.

Sipas një sondazhi të vitit 2022 të kryer nga Banka për Shlyerjet Ndërkombëtare, nga 86 bankat qendrore të anketuara, 93% thanë se po eksploronin këto monedha, ndërsa 58% thanë se do të hidhnin në përdorim një sasi të kufizuar të tyre për një kohë të shkurtër ose afatmesëm. Por që nga qershori, vetëm 11 vende kanë miratuar monedhat digjitale, me 53 të tjera në faza të avancuara të planifikimit dhe 46 që ende po eksplorojnë, sipas të dhënave nga Këshilli Atlantik.

Duke iu referuar një fjalimi të vitit 2018 nga paraardhësja e saj Christine Lagarde, kur ish-kreui i FMN-së inkurajoi politikëbërësit të ndiqnin ‘erërat e ndryshimit’ dhe të eksploronin përdorimin e monedhave digjitale të bankave qendrore, Georgieva tha se pesë vjet më vonë, ajo ishte gati të ofronte një përditësim mbi atë udhëtim.” Gjatë ditës, fondi lançoi një manual për këto monedha si një udhëzues referimi për politikëbërësit në mbarë botën. Georgieva tha se shumë vende po analizojnë përdorimin e tyre dhe po zhvillojnë rregullore për të udhëhequr zhvillimet e parave digjitale.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.