Nafta Brent bie pranë 105 USD – Humbjet kufizohen nga tkurrja e furnizimit dhe nga rënia e infektimeve në Kinë

Nafta po qëndron në rënie në sesionin e sotëm, pasi të dhënat e publikuara kanë shtuar shenjat për ngadalësimin e ekonomisë globale. Në anën tjetër, tkurrja e furnizimit të tregut dhe heqja e kufizimeve të Covid-19 në Kinë po limitojnë humbjet. Nafta Brent e Londrës po tregtohet në rreth 105 dollarë për fuçi, ndërsa nafta Bruto amerikane po tregtohet në rreth 103 dollarë për fuçi.

Të dyja kontratat publikuan humbje, gjatë javës së kaluar, pasi tregu po dominohet nga shqetësimet se rritja e interesave nga bankat qëndrore për të “ftohur” inflacionin, mund të shkaktojë një recesion global. Të dhënat më të fundit mbi rastet me Covid-19 në Kinë treguan një rënie të ndjeshme të infektimeve të reja, por shqetësimet janë prezente sepse në Shanghai është zbuluar një nënvariant i ri i Omicron.

Përsa i përket furnizimit të tregut, investitorët janë të kujdesshëm për shkak të planeve të perëndimit për të vendosur një tavan mbi çmimin e naftës ruse, me presidentin Vladimir Putin që paralajmëroi se sanksione të tjera mund të kenë pasoja katastrofike për tregjet globale të energjisë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.