Tregjet e aksioneve, nën frikën e inflacionit – Pritet edhe sezoni i fitimeve tremujore të korporatave
Tregjet europiane janë hapur në rënie në sesionin e sotëm, pasi investitorët po presin të tjera të dhëna mbi inflacionin, gjatë kësaj jave. Indeksi pan-Europian STOXX 600 është hapur në rënie të lehtë me 0.4%.
Të premten, ndërkohë, tregjet e aksioneve u rritën ndjeshëm për shkak të të dhënave pozitive mbi punësimin në SHBA, që rezultuan mbi parashikimet e analistëve. Raporti, që ishte pozitiv për ekonominë, mund ta inkurajojë Rezervën Federale të vijojë me politikën monetare agresive, për të luftuar inflacionin e lartë.
Gjithashtu, investitorët do të jenë në pritje edhe të sezonit të fitimeve tremujore të korporatave, që nis më vonë gjatë kësaj jave, por edhe të situatës politike në Mbretërinë e Bashkuar. Boris Johnson deklaroi se do të qëndrojë në postin e kryeministrit derisa të gjendet pasuesi i tij. Gjatë ditës së sotme nuk priten të dhëna të rëndësishme, por fokusi do të jetë në ditët në vijim.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.