Nafta Brent rritet në 120 dollarë – Arabia Saudite rrit çmimin për klientët aziatikë

Çmimet e naftës e kanë nisur në rritje edhe këtë javë, me Brentin e Londrës që ka prekur nivelin e 120 dollarëve për fuçi, pasi Arabia Saudite rriti çmimin për klientët aziatikë për shitjet e korrikut, që sinjalizon se furnizimi vijon të tkurret.

Rritja e çmimeve vjen pavarësisht vendimit të OPEC+ javën e kaluar, për të rritur prodhimin me 648,000 fuçi në ditë gjatë korrikut dhe gushtit, ose 50% më shumë se planifikimi i mëparshëm. Ndërkohë, Iraku njoftoi se do të rrisë prodhimin në 4.58 milionë fuçi, gjatë korrikut. Analistët parashikojnë se, tendenca e çmimeve do të jetë në rritje për shkak të rritjes së kërkesës gjatë sezonit veror dhe lehtësimit të masave kundër Covid-19 në Kinë.

Ndërkohë, sipas informacioneve kompania italiane Eni dhe spanjollja Repsol mund të fillojnë të blejnë naftë nga Venezuela, duke filluar që nga muaji i ardhshëm, për të zëvendësuar naftën ruse, e cila është nën sanksionet e Bashkimit Europian. Megjithatë, volumi i naftës që kompanitë do të marrin nuk pritet të jetë i konsiderueshëm dhe për këtë arsye nevojiten tregje të reja.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.