Nafta, e qëndrueshme në mbi 80 USD – Por, pritet të publikojë humbje për të tretën javë me radhë

Nafta po qëndron në rritje edhe në sesionin e sotëm, por pritet të publikojë humbje për të tretën javë me radhë, për shkak se janë larguar shqetësimet se furnizimi i tregut mund të përballët me një çrregullim, si pasojë e konfliktit mes Izraelit dhe Hamasit. Nafta Brent e Londrës po tregtohet në mbi 80 dollarë për fuçi, ndërsa nafta Bruto amerikane po tregtohet në rreth 76 dollarë për fuçi. Ndërsa, përgjatë kësaj jave të dyja kontratat kanë rënë me rreth 5%.

Tre javë me radhë në rënie janë seria më e gjatë e humbjeve që nga rënia 4-javore në prill dhe maj të këtij viti. Analistët shprehen se kërcënimi i ndërprerjeve të furnizimeve nga Lindja e Mesme vazhdon të zbehet. Kërcënimi mbetet i izoluar brenda Gazës, pavarësisht shqetësimeve se konflikti mund të përshkallëzohej sepse vendet arabe gjithmonë e më shumë po protestojnë kundër Izraelit.

Shtëpia e Bardhë tha të enjten se Izraeli kishte rënë dakord të ndalonte operacionet ushtarake në pjesë të Gazës veriore për katër orë në ditë, megjithëse nuk kishte asnjë shenjë për një ndërprerje të plotë. Por, në anën tjetër po rriten shqetësimet për ngadalësimin e kërkesës, sidomos nga Kina, që është importuesja më e madhe e naftës në botë. Të dhënat e dobëta ekonomike në Kinë, që u publikuan gjatë kësaj jave, rritën shqetësimet për rënien e kërkesës.

Për më tepër, rafineritë në Kinë, që janë blerësit më të mëdhenj të naftës bruto nga Arabia Saudite, kërkuan më pak furnizim nga ky vend për dhjetorin. Megjithatë, analistët e CitiBank deklaruan se presin që presioni në rënie të lehtësohet dhe çmimet të rimëkëmben nga niveli më i ulët që nga korriku, që ndodhën aktualisht.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.