Dollari, fitime javore prej 0.8% – Mbështetet nga rritja e mundësive për shtrëngimin e politikës monetare

Dollari po qëndron në rënie të lehtë në sesionin e sotëm, pas fitimeve të realizuara një ditë më parë, si pasojë e komenteve të bëra nga shefi i Rezervës Federale, Jerome Powell, i cili tha se banka qendrore mund të rrisë sërish normat e interesit.

Disa politikëbërës në SHBA, duke përfshirë edhe presidentin Powell, deklaruan të enjten se nuk janë ende të sigurt nëse normat e interesit janë mjaft të larta për të përfunduar betejën me inflacionin.

Këto komente rritën dollarin dhe yield-in e obligacioneve 10-vjeçare të thesarit amerikan. Ndërkohë, në raport me jenin japonez, dollari ka prekur nivelin më të lartë në 1 vit, në mbi 151. Gjatë kësaj jave, monedha e gjelbër është rritur me 1.4% në raport me jenin, fitimet më të mëdha javore që nga gushti i këtij viti. Dobësimi i jenit po i mban tregtarët në gatishmëri për shenja të ndërhyrjes nga qeveria japoneze për të mbështetur monedhën.

Autoritetet ndërhynë dy herë vitin e kaluar në përgjigje të rënies së monedhës vendase. Zhvlerësimi i kohëve të fundit rrit mundësitë e ndërhyrjes së Bankës së Japonisë në tregun forex, për të forcuar jenin, por me shumë mundësi kjo do të ndodhë nëse raporti dollar/jen shkon në mbi 152.

Në anën tjetër, indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 105.9, ndërsa gjatë kësaj jave është rritur me rreth 0.8%.

Euro po këmbehet në rreth 1.067 dollarë, pasi humbi 0.4% të vlerës në sesionin e kaluar. Edhe paundi britanik ka zbritur drejt 1.22 dollarëve, për shkak se ekonomia e Mbretërisë së Bashkuar u përball me një stanjacion në tremujorin e tretë të vitit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.