Nafta, e qëndrueshme pranë 76 USD – Investitorët, të shqetësuar për ngadalësimin e kërkesës

Nafta po qëndron në rritje të lehtë në sesionin e sotëm, ndërsa një ditë më parë publikoi humbje për të tretën ditë me radhë. Forcimi i dollarit amerikan dhe shpresat për stimuj në ekonominë kineze kanë ofruar një mbështetje për çmimet e naftës.

Nafta Brent e Londrës po tregtohet në rreth 76 dollarë për fuçi, ndërsa nafta Bruto amerikane po tregtohet në rreth 71 dollarë për fuçi. Dollari amerikan gjeti një mbështetje të lehtë nga të dhënat shumë pozitive mbi ndërtimin e shtëpive të reja në Shtetet e Bashkuara të Amerikës. Megjithatë, investitorët janë të shqetësuar për zbehjen e rimëkëmbjes ekonomike në Kinë, që është importuesja më e madhe e naftës në botë.

Për këtë arsye, Banka Qendrore e Kinës uli interesin për kreditë 1-vjeçare dhe 5-vjeçare me 10 pikë bazë, në përpjekje për të mbështetur kreditimin. Edhe investitorët në tregun e naftës po presin dëshminë e shefit të FED, Jerome Powell, përpara Kongresit amerikan dhe të dhënat mbi rezervat e naftës në SHBA për javën e kaluar. Analistët e anketuar nga Reuters parashikojnë se, rezervat do të kenë rënë me rreth 400 mijë fuçi, gjatë javës që u mbyll më 16 qershor.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.